Қазақстандықтардың несие тарихын мерзімі өткен төлемдердің бір бөлігінен тазартқысы келеді

Ломбардтардағы қарыз бойынша мерзімі өткен төлемдер қазақстандықтардың несие тарихына әсер етпеуі мүмкін. Қаржы нарығын реттеу және дамыту агенттігі (ҚНРДА) құжат әзірледі. Оған сәйкес несие есептерінен автокөлік пен басқа да жылжымалы мүлік кепілімен берілген микрокредиттер бойынша мерзімі өткен төлемдер, айыппұлдар мен өсімпұлдар туралы ақпарат алынып тасталады, деп хабарлайды Tengrinews.kz тілшісі.

Несие тарихынан қандай мерзімі өткен төлемдер алынып тасталады?

Өзгерістер жобасына сәйкес, ломбардтардан жеке мүлік, соның ішінде автокөлік кепілімен алынған қарыздар бойынша мерзімі өткен төлемдер туралы ақпарат несие тарихында көрсетілмейді.

Өзгерістер күшіне енген соң, несие есебінде мына мәліметтер көрсетілмейтін болады:

төлемнің кешіктірілген күндер саны; мерзімі өткен төлемдер сомасы; есептелген айыппұлдар мен өсімпұлдар; соңғы төлем жасалған күн.

Бұдан бөлек, несие бюролары қарыз алушы берешегін толық өтеп, шарт жабылғанға дейін мұндай қарыздың мәртебесін "қолданыстағы" деп сақтауға міндеттеледі.

"Ломбард жеке пайдалануға арналған жылжымалы мүлік кепілімен берген микрокредит беру туралы шарт бойынша несие есебін ұсынған кезде, несие бюросы қарыз алушының міндеттемесі мен микрокредит беру туралы шарт тоқтатылғанға дейін несие есебінде микрокредиттің "Қолданыстағы" мәртебесі көрсетілуін қамтамасыз етеді", – делінген ҚНРДА құжатында.

Сондай-ақ несие есептерінде қарыз алушының несие алудан ерікті түрде бас тартуды белгілегені (немесе оны алып тастағаны) көрсетіледі.

ҚНРДА қаулысының жобасы алғашқы ресми жарияланған күнінен кейін күнтізбелік 10 күн өткеннен кейін күшіне енеді.

Бұған дейін болашақта Қазақстанда несие алу қиындауы мүмкін екені хабарланған. Ұлттық банк қарыз алушыларды бағалаудың жаңа механизмін – қарыздың табысқа арақатынасы (ҚТА) коэффицентін енгізу мүмкіндігін қарастырып жатыр.

Ол адамның ай сайынғы табысының қанша бөлігі барлық несиесі бойынша төлемдерге кететінін көрсетеді. Егер борыштық жүктеме тым жоғары болса, банк жаңа қарыз беруден бас тартуы мүмкін. Қазірше бұл ережелер қабылданған жоқ, бірақ реттеуші оларды талқылауды жалғастыруда.

Google News арқылы жаңалықтарымызды қадағалаңыз

Жазылу