Қазақстандықтарға PS Store қайтарыла ма? Қазір Sony мен не туралы келіссөздер жүргізіліп жатыр

Қазақстандық геймерлердің ойын сатып алуға арналған PlayStation Store онлайн-дүкеніне қол жеткізе алмағанына бес жыл болды. Қазір бұл мәселемен Ұлттық банк айналыса бастады. Осы уақытқа дейін не белгілі – Tengri Life материалында.

PS Store-сыз бесінші жыл

Шектеу Sony компаниясы 2022 жылғы наурызда санкцияларға байланысты Ресейдегі сервистерінің жұмысын тоқтатқаннан кейін пайда болды. Салдарынан елімізде консольдер ресми түрде сатылғанымен, қазақстандық пайдаланушылар үшін де қолжетімділік мәселесі туындады.

Бұған дейін PlayStation Network желісіне тіркелу кезінде қазақстандық пайдаланушылар біздің өңірді таңдай алмайтын - атап айтқанда, ресейлік және украиналық аймақтар қолжетімді болды. Мұндай аккаунтқа қазақстандық банк картасын байланыстыру мүмкін емес еді. Сондықтан көпшілігі ойындарды сатып алу және цифрлық қызметтерді пайдалану үшін ресейлік өңір бойынша аккаунт тіркейтін.

Шектеу енгізілгеннен кейін мұндай аккаунттар қиындықтарға тап болды: пайдаланушылар дүкенге және цифрлық сервистердің бір бөлігіне, сондай-ақ бұрын рәсімделген кейбір жазылымдарға қол жеткізе алмай қалды.

Кейбір бағалаулар бойынша, Қазақстандағы 50 мыңға жуық PlayStation иесі ойын сатып алу және PlayStation Store-ды пайдалану кезінде кедергіге тап болған.

Қазақстандық ведомстволар мәселені шешпек болды. Цифрлық даму министрлігі (қазіргі Жасанды интеллект және цифрлық даму министрлігі) Sony Interactive Entertainment компаниясына Қазақстанда сервистің жұмысын қайта бастау туралы ресми сауал жолдады.

Бұған дейін БАҚ-та Ұлттық банк сервисті толыққанды іске қосу туралы келіссөз жүргізіп жатқаны туралы ақпарат пайда болды. PlayStation Store цифрлық дүкенінде қазақстандық пайдаланушылар үшін жеке өңір пайда болуы мүмкін деп болжанған.

Tengrinews.kz ресми сауал жолдады.

"Ұлттық банк қазақстандық төлем карталарын пайдалана отырып, шетелдік цифрлық және ойын сервистеріне төлем жасауға қатысты мәселелердің барын біледі. Қаржы нарығына қатысушылармен бірлесіп, қолданыстағы шектеулер мен оларды жоюдың ықтимал тәсілдері зерделеніп жатыр. Бұл ретте мұндай мәселелердің едәуір бөлігі тікелей нарық пен шетелдік сервистердің өзара әрекеттесуіне қатысты".

Жасанды интеллект министрлігі халықаралық технологиялық компаниялармен, соның ішінде ойын сервистеріне қолжетімділікті кеңейту бойынша келіссөзді жалғастырып жатқанын хабарлады.

Бұл ретте жеке өңірлерді, төлем жүйелерін және жергілікті сервистерді іске қосу туралы шешімді "өздерінің техникалық және өзге де талаптарын ескере отырып, компаниялардың өздері қабылдайды".

"Министрлік өз тарапынан Қазақстанды дербес цифрлық нарық ретінде танытуды жүйелі түрде ілгерілетіп келеді және халықаралық технологиялық компанияларды тарту үшін қолайлы жағдай жасау бойынша жұмысты жалғастырып жатыр", – делінген сауалға берілген жауапта.

PlayStation Store-ға қолжетімділік жабылғаннан бері журналистер шенеуніктерден бұдан былай не болатынын және сервис қашан қайтарылатынын бірнеше рет сұрады. Бірақ әр жолы: "Мәселе бойынша жұмыс істеп жатырмыз, хат жіберілді" деген бірсарынды жауап айтылады. Осы уақыт ішінде ЦДИАӨМ-да министрлер де ауысып үлгерді: бұл оқиға Бағдат Мусиннің тұсында (2024 жылғы сәуірде қызметінен кетті) басталып, қазір Жаслан Мәдиевтің кезінде жалғасып жатыр. Министрлердің (және олардың орынбасарларының) уәделері хронологиясын ұсынамыз:

1. 2023 жылғы 14 наурызда сол кездегі министр Бағдат Мусин қазақстандық тарап Sony-ден әлі жауап ала алмағанын айтты.

2. 2023 жылғы 10 қарашада сол кездегі вице-министр Асхат Оразбек "қазір Sony корпорациясы біздің өңірде Sony PlayStation аккаунттарына қолжетімділік беруді жоспарлап отырған жоқ" деді.

3. 2023 жылғы қарашада БАҚ ЦДИАӨМ Sony-дің Калифорниядағы кеңсесіне PlayStation Network-ке қолжетімділікті қайтаруды және қазақстандық банк карталарымен төлеу мүмкіндігін беруді сұрап хат жолдағанын жазды. Жауап келмеді – сауал Sony-дің Жапониядағы кеңсесіне қайта бағытталды. Ол кезде келіссөзге Қазақстанның Жапониядағы елшілігі тартылды.

4. 2023 жылғы 23 желтоқсанда ЦДИАӨМ Қазақстанның Жапониядағы елшілігі Sony өкілдерімен келіссөз жүргізуге тырысқанын хабарлады. Бірақ олар ауызша жауап берді: қазіргі жағдайды ескере отырып, компания әзірге нақты жауап бере алмайды.

5. 2024 жылғы 20 маусымда министр Жаслан Мәдиев Sony өкілдерімен кездескенде PlayStation Store-ды Қазақстанға қайтару мәселесін тағы да көтеретінін айтты.

6. 2024 жылғы 26 қарашада Мәдиев журналистерге Sony Қазақстанды PlayStation Store-ға қайтармай отырғанын, себебі ресейлік және санкциядағы басқа елдердің ойыншылары қазақстандық аккаунттар ашып, шектеулерді айналып өтеді деп қауіптенетінін мәлімдеді.

7. 2025 жылғы 30 мамырда ЦДИАӨМ басшысы Sony-ге хат жіберілгенін тағы қайталады.

8. 2026 жылғы 1 наурызда Жасанды интеллект министрлігі Sony компаниясы осы күнге дейін ресми жауап бермегенін хабарлады.

Еске сала кетейік, мыңдаған қазақстандық Sony басшылығынан елді PlayStation сервистеріне қосуды сұраған болатын. Жұрт Sony компаниясы ойын бөлімшесінің басшысына арналған петицияға қол қойып, елді компанияның цифрлық сервистеріне қосуды сұраған еді. Бірақ бұл жалпы жағдайға әсер етпеді.

Бізді Google-дың негізгі дереккөздер тізіміне қосыңыз