Қазақстандықтарға туған күнінде ақылы демалыс берілуі мүмкін

Жұмыс беруші қызметкерді туған күнінде жұмыстан босатуға міндетті ме және мұндай демалыс күнін ақылы етуге бола ма? Tengri Life ақпарат алу үшін Еңбек және халықты әлеуметтік қорғау министрлігіне жүгінді.

Туған күнде демалыс берілуі тиіс пе?

Еңбекмин ұсынған ақпаратқа сәйкес, заң бойынша туған күн мерекелік күн болып есептелмейді және өздігінен жұмысқа шықпауға құқық бермейді.

Еңбек кодексінде де мұндай себеп бойынша міндетті демалыс немесе ақылы демалыс күні қарастырылмаған.

Бұл ретте жұмыс беруші қызметкерлер үшін қосымша кепілдіктер мен әлеуметтік жеңілдіктерді өзі белгілей алады.

"Жұмыс беруші қосымша әлеуметтік қолдау шарасы ретінде қызметкерлердің туған күнінде қосымша ақылы демалыс күнін белгілеуге құқылы", - деп хабарлады министрлік.

Мұндай ережені ұжымдық немесе еңбек шартында, болмаса жұмыс берушінің актісінде бекітуге болады. Яғни, компания қызметкердің туған күнін қосымша ақылы демалыс күні етуге құқылы.

Мұндай жеңілдік барлық қызметкерге де, сондай-ақ қызметкерлердің жекелеген санаттарына да қолданылуы мүмкін. Алайда Еңбек министрлігі жағдайлар кемсітушіліксіз негізде қолданылуы тиіс екенін, ал айырмашылықтардың объективті және негізді себебі болуы керектігін атап өтті.

Егер жұмыс беруші арнайы демалыс қарастырмаған болса, қызметкер бұл күні басқа жолмен демалып көре алады.

Мысалы, жұмыс берушімен келісім бойынша жалақысы сақталмайтын демалыс алуға болады. Тағы бір нұсқа - жыл сайынғы ақылы еңбек демалысының бір бөлігін пайдалану.

Бұл ретте туған күнінде жұмысқа шықпау туралы шешімді өз бетінше қабылдауға болмайды.

"Егер туған күн жұмыс күніне сәйкес келсе және жұмыс беруші арнайы жеңілдік белгілемесе, қызметкер жұмысқа біржақты тәртіппен шықпай қоюға құқығы жоқ", - деп түсіндірді Еңбек министрлігіндегілер.

Егер қызметкер ақылы демалысты бекітілген кестеден тыс пайдаланғысы келсе, мұны да жұмыс берушімен келісу қажет.

Осылайша, Қазақстанда туған күнде міндетті демалыс жоқ. Алайда компаниялар мұндай жеңілдікті өз бетінше енгізіп, тіпті қызметкердің сол күндегі жалақысын сақтап қала алады.

Еске сала кетейік: қазан айының соңында Республика күніне орай қазақстандықтарды үш күндік демалыс күтеді. Жақындарыңызбен кездесулерді немесе сапарларды алдын ала жоспарлауыңыз үшін Tengri Life жұмыс және мереке күндерінің ыңғайлы күнтізбесін дайындады.

Бізді Google-дың негізгі дереккөздер тізіміне қосыңыз