Қазақстандықтарға ұялы байланыс операторларының мазасыз қызметінен бас тартуға рұқсат беріледі

Қазақстанда байланыс операторлары үшін жаңа ереже енгізіледі. Бұдан былай қазақстандықтар мазаны алатын жарнамалық хабарламалар мен автоқоңыраудан бас тарта алады. Бұл туралы цифрлық даму, инновациялар және аэроғарыш өнеркәсібі вице-министрі Досжан Мүсәлиев айтты, деп хабарлайды Tengrinews.kz тілшісі.

Функция қашан іске қосылады?

Досжан Мүсәлиевтің айтуынша, бұл мәселені реттейтін заң тамыздың соңында күшіне енеді.

Қазіргі уақытта заңға тәуелді актілер әзірленіп жатыр. Мәселен, маусымда байланыс операторларының жарнамалық хабарламалары мен автоқоңыраудан бас тарту функциясының жұмыс істеу тәртібін айқындайтын норма қабылданды.

"Бұл мәселені халық жиі көтерді. Мысалы, біреуге қоңырау шалып, ол абонент желіге қосылған кезде, оператор хабарласқан адамға "маяк" арқылы ақпарат беретін. Мұндай қоңырау түнде де болуы мүмкін еді. Енді бұлай болмайды. Оның орнына тек хабарлама жіберіледі", – деді ол.

Анықтама: Автоқоңырау – желі бос болмағанда немесе байланыс орнатылмаған жағдайда абонентке қайта қоңырау шалу әрекетін автоматты түрде қайталайтын функция. Жүйе байланыс орнатылғанша белгілі бір уақыт аралығында нөмірді қайта-қайта тереді.

Қазақстанда автоқоңырауларға тыйым салу туралы 2026 жылдың мамырында айтыла бастады. Сол кезде Мәжіліс депутаты Асхат Аймағамбетов мұндай қоңыраулар қазақстандықтар үшін баяғыдан проблемаға айналғанын айтып, депутаттар оған тыйым салуды бұрын да ұсынғанын еске салды. Бұған жауап ретінде цифрлық даму министрі Жаслан Мәдиев бұл ұсыныс қаралатынын хабарлады.

Бөтен нөмірлерден келетін қоңыраулар тақырыбы телефон алаяқтығының белең алуына байланысты жиі көтеріліп тұрады.

Бұған дейін Tengrinews.kz адамға алдымен "сіздің несиеңіз мақұлданды" деген хабарламамен қоңырау шалып, кейін өздерін ІІМ қызметкерлері ретінде таныстырған алаяқтар байланысқа шығып, ақша аударуға көндіретін схема туралы жазған болатын.

2023 жылдың өзінде байланыс операторлары жалған нөмірлерден жасалған 43,5 миллион халықаралық қоңырауды бұғаттады.

Google News арқылы жаңалықтарымызды қадағалаңыз