Қазақстандықтарға 22 тамыздан бастап Каспийдің жаңа аймақтарында демалуға рұқсат беріледі

Каспий теңізінің қазақстандық жағалауындағы төрт учаскеде режимдік шектеулер уақытша алып тасталады. Тиісті бұйрыққа Ұлттық қауіпсіздік комитетінің төрағасы қол қойды, - деп хабарлайды Tengri Travel.

Құжатқа сәйкес, өзгерістер 2026 жылғы 22 тамызда күшіне еніп, 2026 жылғы 31 желтоқсанға дейін қолданылады.

Қай учаскелер ашылады?

Каспийдің қазақстандық жағалауындағы төрт учаскеде режимдік шектеулер алынады:

Түпқараған мүйісінен Үрдік мүйісіне дейін; Саура елді мекенінен Сағындық мүйісіне дейін; Жартасты мүйісінен Құмды мүйісіне дейін; Құмды мүйісінен Адамтас мүйісіне дейін.

Бұл учаскелерде демалыс, туризм және спорт мақсатында қазақстандық шағын көлемді кемелермен теңізге шығуға рұқсат етіледі.

Бұл жерде катерлер, қайықтар және гидроциклдерді қоса алғандағы басқа да шағын кемелер туралы сөз болып отыр. Жағалаудан екі теңіз милінен - шамамен 3,7 шақырымнан аспайтын қашықтыққа ұзауға болады.

Қандай шектеулер сақталады?

Режимнің алынуы демалушылар үшін бүкіл жағалау немесе Каспийдің барлық акваториясы қолжетімді болады дегенді білдірмейді.

Бұрынғыдай, теңіздегі экономикалық қызмет аймақтарында шектеулер сақталады. Олардың қатарында:

теңіз порттары; су тартқыш арналар; газ терминалдары; кеме жүретін фарватерлер; теңіз дәліздері бар.

Бұл аймақтарға шағын көлемді кемелермен кіруге бұрынғыша тыйым салынады.

Айта кетейік, кейінгі жылдары Каспий теңізінің жағалауы демалыс үшін танымал бағытқа айналып келеді. Ақтау маңына туристер тек жағажай демалысы үшін ғана емес, сонымен қатар теңізде серуендеу, балық аулау және су астына сүңгу үшін де келеді.

Google News арқылы жаңалықтарымызды қадағалаңыз

Жазылу