Қазақстаннан ұшқан қарақұс Үндістанда сұмдық жағдайға тап болды

Қазақстаннан ұшқан қарақұс Үндістанға дейін жеткенімен, көп ұзамай қаза тапты, деп хабарлайды Arasha.kz.

Наурыз айының басында Үндістанның Раджастхан штатындағы Джодхпур маңынан GPS-трекер орнатылған қазақстандық қарақұстың өлі табылғаны туралы хабар тараған. Құс халықаралық бағдарлама аясында бақылауда болған.

Орнитологтар құстың өлімін растады. Мамандардың мәліметінше, 2026 жылдың ақпан айының басынан бастап GPS сигналы бір ғана нүктеден өзгеріссіз түсе бастаған. Кейін Үндістандағы маман құстың қыстайтын аймағына барып, оның өлі денесін емес, тек сүйек-қалдықтары мен қауырсындарын, сондай-ақ трекерге тиесілі металл сақиналарды тапқан.

Қазіргі уақытта құстың өлім себебі белгісіз күйінде қалып отыр.

Мамандардың айтуынша, қарақұс – қанатының ұзындығы 3 метрге дейін жететін, салмағы 7-12 келі болатын ірі жыртқыш құс. Қазақстанда ол негізінен Тянь-Шань аумағында ұялайды.

GPS-трекерлер Қазақстанда сирек кездесетін жануарларды бақылау үшін қолданылады. Олардың қатарында киік, қар барысы, құлан, арқар, тоғай бұғысы, қарақұйрық, Тянь-Шань қоңыр аюы және бірқатар қоныс аударатын құстар бар.

Мамандар құстардың басқа елдерге ұшуы қалыпты құбылыс екенін айтады. Бұл олардың тіршілігін зерттеу мен қорғауда халықаралық ынтымақтастықтың маңызды екенін көрсетеді.

Соңғы деректерге сәйкес, қазақстандық ғалымдар соңғы бір жылда бірнеше құс түрінің көші-қонын бақылап, олардың Пәкістан, Үндістан, Эфиопия және Вьетнам сияқты елдерде қыстайтынын анықтаған.