Қазақстанның солтүстігінде сирек кездесетін табиғи құбылыс видеоға түсіп қалды

Солтүстік Қазақстан облысында ауыл тұрғындары сирек кездесетін табиғи құбылысты, болжам бойынша торнадоны видеоға түсіріп алды, деп хабарлайды Tengri Life.

Желіде Солтүстік Қазақстан облысы Шал ақын ауданындағы Кіші Тораңғыл көлінде түсірілген видео пайда болды. Кадрлардан бұлттан суға дейін жететін айналмалы ауа бағанын көруге болады.

"Осы күнге де жеттік, енді бізде торнадо болып жатыр, - дейді видео авторы. - Қандай шу келе жатыр! Міне, ол жетті де!"

Instagram-дағы бұл жарияланымды көру

ПЕТРОПАВЛОВСК | СКО (@skopetro) жарияланымы

"Көлдің суын сорып жатыр, қарашы - су деңгейі түсіп кетті", - деп әзілдейді тағы бір куәгер.

Tengrinews.kz тілшісі пікір алу үшін облыстық төтенше жағдайлар департаментіне жүгінді.

"Аудандағылар мұндай табиғи құбылыс болғанын растады. Абырой болғанда, ешқандай қирау мен зардап болған жоқ. Бұл көлдің үстінде ғана болды", - деп түсіндірді СҚО ТЖД баспасөз хатшысы Евгений Журавлев.

"Қазгидромет" облыстық филиалы видеода түсірілім орны мен уақыты туралы ақпарат жоқ екенін, сондықтан оның қайда және қашан түсірілгенін анықтау мүмкін еместігін хабарлады.

"Оның үстіне Кіші Тораңғылда біздің бақылау пунктіміз жоқ. Сондықтан бұл фактіні растай да, жоққа шығара да алмаймыз. Бірақ теориялық тұрғыдан алғанда, көл үстінде торнадо түзілуі мүмкін, ол үшін белгілі бір жағдайлар болу керек", - деді Tengrinews.kz-ке филиал директорының орынбасары Наталья Левина.

Мұндай жағдайлар қатарына желдің әртүрлі бағыты, биіктіктегі ауа температурасының айырмашылығы және басқалар жатады. Мысалы, торнадо суық және жылы ауа массалары соқтығысқанда пайда болады. Жылы ауа будақ-жаңбырлы бұлт арқылы шиыршық тәрізді айналып, күрт жоғары көтеріледі. Құйын ішінде атмосфералық қысым төмендейді, соның салдарынан ол алып шаңсорғыш сияқты жұмыс істеп, суды, шаңды және кез келген нысанды өзіне тартып алады.

"Бірақ өңірде ресми тіркелген торнадо жағдайлары болған жоқ", - деп түйіндеді Наталья Левина.

Айта кетейік, 3 шілдеде Солтүстік Қазақстан облысында жаңбыр мен найзағайға байланысты ескерту жарияланған болатын. Синоптиктер облыстың батысында, солтүстігінде және шығысында нөсер жаңбыр, бұршақ, дауыл, екпіні секундына 23-28 метрге жететін жел соғатынын хабарлаған.

Сенбі, 4 шілдеге де ескерту жарияланды.

"4 шілдеде Солтүстік Қазақстан облысында жаңбыр, найзағай, облыстың батысында, солтүстігінде, оңтүстігінде нөсер, бұршақ, дауыл күтіледі. Түнде және таңертең облыстың батысында, солтүстігінде тұман болады. Оңтүстік-батыстан соғатын желдің екпіні түнде облыстың батысында, солтүстігінде, оңтүстігінде 15-20 м/с, күндіз 15-20, облыстың батысында, оңтүстігінде екпіні 25 м/с жетеді. Петропавлда 4 шілдеде жаңбыр, найзағай, күндіз бұршақ, дауыл күтіледі. Оңтүстік-батыстан соғатын желдің жылдамдығы 20 м/с дейін жетеді", - делінген "Қазгидромет" хабарламасында.

Бұған дейін маусымның соңында Маңғыстау облысында құйын видеоға түсіп қалғаны хабарланған болатын. Кадрлардан оның Түпқараған ауданы Таушық ауылы көшелерімен жүріп өткенін көруге болады.

Google News арқылы жаңалықтарымызды қадағалаңыз

Жазылу