Қазақстанның солтүстігінде су бөгеттен асып жатыр, тасқынның шыңы әлі алда

Солтүстік Қазақстан облысындағы Сергеев су қоймасы ернеуінен асып, тола бастады. Қазір бөгеттен асқан су деңгейі шамамен 20 сантиметрге жетті, - деп хабарлайды Tengrinews.kz тілшісі "Жетінші арнаға" сілтеме жасап.

Солтүстік Қазақстан облысындағы Сергеев су қоймасы ернеуінен асып, тола бастады. Қазір бөгеттен асқан су деңгейі шамамен 20 сантиметрге жетті, - деп хабарлайды Tengrinews.kz тілшісі "Жетінші арнаға" сілтеме жасап.

Телеарна мәліметінше, су ағыны уақыт өткен сайын күшейіп келеді. Сондықтан гидролог мамандар әр 2-3 сағат сайын болжам жасап, жағдайды жіті қадағалап отыр.

Биыл стратегиялық нысан 2,6 миллиард текше метр су қабылдайды. Бұл өткен жылмен салыстырғанда 26 пайызға аз.

Кейінгі күндері өңірде күн күрт жылынып, қардың басым бөлігі еріп үлгерді. Салдарынан кіші өзендер арнасынан асып жатыр, сондықтан облыста дайындық жұмыстары күшейтілді. Тасқынның алдын алу үшін барлық күш пен техника жұмылдырылды.

112 елдімекен құтқарушылардың бақылауында екені хабарланды. Есіл өзені тасығанда жыл сайын қатынассыз қалатын Прибрежное ауылында таяу күндері жедел штаб құрылады.

"Петропавл қаласы маңында су деңгейінің көтерілуі 8-9 сәуірде басталып, 1 мамырға дейін жалғасады. Облыстың барлық өзендерінде мұздың жұқаруы байқалады", - деп түсіндірді "Қазгидромет" филиалының бөлім басшысы Дәурен Қосшығұлов.

Оның айтуынша, су деңгейі көтерілгенде мұздың жарылуы мен сең жүруі күтіледі, бұл кептелістердің пайда болу және су деңгейінің қауіпті межеге дейін көтерілу қаупін тудырады. Сондай-ақ еріген қар суынан келетін қауіп сейілген жоқ, бұл автожолдарда су тасқынына әкелуі мүмкін. Солтүстік Қазақстан облысында тасқынның шарықтау шегі әлі өткен жоқ, деп толықтырды ол.

Следите за нашими новостями в Google News