Қазақстанның үш облысында аномальді ыстық жолдарды зақымдады

Жамбыл, Павлодар және Түркістан облыстарында күннің қатты ысуынан цемент-бетон жолдарда температуралық деформациялар пайда болды, деп хабарлайды Tengri Auto.

Мұны кеше "ҚазАвтоЖол" компаниясының баспасөз қызметі мәлімдеді.

Компания мәліметінше, жол қызметтері автожолдарды тәулік бойы бақылап отыр. 18 шілдедегі жағдай бойынша жалпы ұзындығы 1636,5 шақырым болатын жол учаскелері бақылауға алынған.

"Жоспарлы тексерулер барысында мамандар Жамбыл, Павлодар және Түркістан облыстарында жергілікті температуралық деформациялар орын алған алты учаскені дер кезінде анықтады. Олардың әрқайсысына дереу жол бригадалары мен арнайы техника жіберілді", - делінген хабарламада.

Жөндеу жұмыстарына барлығы 51 жол маманы мен қажетті арнайы техника жұмылдырылған. Анықталған ақаулардың барлығы жойылып, көлік қозғалысы толық қалпына келтірілді.

Ауа температурасы тым жоғары болған кезде цемент-бетон жабынының беті +60…+70 градусқа дейін, кейде одан да қатты қызуы мүмкін. Соның салдарынан бетон плиталарының ішінде айтарлықтай қысым пайда болады. Бұл - жолды пайдалану кезінде кездесетін қалыпты құбылыс және әлемнің көптеген елінде аптап ыстық кезінде байқалады.

Сондықтан жаз мезгілінде жолдардың жағдайын үздіксіз бақылауға ерекше мән беріледі, деп атап өтті компания өкілдері. Тұрақты патрульдеу температуралық деформация қаупі бар учаскелерді ерте анықтауға, күрделі зақымның алдын алуға және жөндеу жұмыстарын дер кезінде жүргізуге мүмкіндік береді.

Еске салайық, 2026 жылдың жазы кейінгі жылдардағы ең ыстық кезеңдердің бірі болды. Маусымда Қазақстанда бірнеше температуралық рекорд жаңарса, шілдеде аптап одан әрі күшейді. Кейбір қалаларда көшелерге су себіліп, балаларға арналған су алаңдары іске қосылды. Ал кей өңірлер ұзаққа созылған ыстықтан кейін жауған алғашқы жаңбырды күтті.

Google News арқылы жаңалықтарымызды қадағалаңыз