Ақтөбе облысында күре жолдарды қадағалау күшейтілді

Ақтөбе облысындағы халықаралық және республикалық жолдарда полиция патрульдерінің саны 2,5 есе артты.

Облыс орталығынан шығатын 5 бағытты күніне 25 жасақ қадағалайды. Тәртіп сақшылары көлік апатының алдын алуға ерекше көңіл бөлуде. Облыстық полиция департаменті басшысының өзі «Батыс Еуропа-Батыс Қытай» халықаралық дәлізін бақылауға шықты. 

Халықаралық тас жолдың 700 шақырымы Ақтөбе облысы аумағынан өтеді. Оның ішінде Хромтау қаласы арқылы, еліміздің оңтүстік өңірлерімен байланыстыратын бағытта көлік нөпірі күндіз-түні азаймайды. Тәулігіне 3 мың автомобильге есептелген жолмен қазір 16 мың өтеді. Көлік апатының көптігі де сондықтан. Жыл басынан бері 101 жол апаты тіркеліп, 41 адам қаза тапты, 200-ден астам жолаушы жарақат алған.

Абай Жүсіпов, облыстық ПД бастығы:

- Негізгі себептері - жүргізушілердің жылдамдықты асыру және қарсы бағытқа шығуы.

«Қауіпсіз жол» республикалық жедел алдын алу шарасы аясында полиция департаменті бастығының өзі халықаралық дәліз бойына шығып жүргізушілермен жүздесті. Оларға жол қозғалысы ережелерін бұлжытпай орындау керектігін ескертті.

Абай Жүсіпов, облыстық ПД бастығы:

- Осы жолдарда «223 АСФ» автоматикалық жол жүру ережесін бұзғанды анықтайтын. Оның ішінде 183-і стационарлық, 40 мобильдік. Осы мобильдік анықтаудың 15-і жасырын патрульдегі фиксациялар.

Ұлықбек Асылбекұлы, облыстық ПД Рота патрульдік полициясының инспекторы:

- Дрон аппараты әртүрлі қашықтықта ұшады. Дәл қазір 4-5 шақырым қашықтықты бақылап отырмыз. Яғни көзіміз жетпейтін жерді дрон аппараты арқылы біліп отырамыз. Дрон аппаратымен жол сілтеп әкеледі. Біз хаттамасын толтырамыз.

Полиция жасақтары көлік нөпірі көп «Самара-Шымкент» бағытында да көбейген. Бұған дейін бұл жолға тәулігіне 4 патруль шықса, қазір 11 экипаж жол қауіпсіздігін қадағалайды.

Авторлары: Мансұр Есқожин, Болатбек Молдағалиев, Айбек Даутов