Қазақстандағы аномальді ыстық егін жинау науқанын жеделдетті

Аптап отандық аграршылардың жұмыс кестесіне түзетулер енгізді. Ауа температурасының жоғары болуына байланысты дәнді дақылдар әдеттегіден ерте пісіп, қазір алқаптарда комбайндар қызу жұмысқа кірісті, деп хабарлайды Tengrinews.kz КТК арнасына сілтеме жасап.

Телеарна мәліметінше, дүйсенбі кешке қарай еліміз бойынша егістік алқаптарының 15 пайыздан астамы жиналды.

"Бүгінгі таңда 2,6 миллион гектар жер жиналды. 3,8 тонна астық бастырылды. Жалпы алғанда, өткен жылмен салыстырғанда қарқын өте жақсы. Өнімділік деңгейі былтырғымен бірдей. Жиналған алқап көлемі бойынша айырмашылық бар: биыл – 2,6 миллион, өткен жылы – 1,3. Демек, қарқын 2 есе жоғары", - деп түсіндірді Ауыл шаруашылығы министрлігі Егіншілік департаменті директорының міндетін атқарушы Жандәулет Жаңбырбаев.

Жиналған астықтың жартысына жуығы үшінші сапа класының талаптарына сәйкес келеді, яғни өңдеуге жарамды. Ауыл шаруашылығында бұл өте жақсы көрсеткіш болып саналады, делінген материалда.

Майлы дақылдар дәнді дақылдарға қарағанда кеш пісетіндіктен, аграршылар оларды жинауға әзірге асығар емес. Жоспар бойынша комбайндар оларды жинау үшін қыркүйектің аяғында алқапқа шығады. Дала жұмыстарына өңірлерге 400 мың тонна дизель отыны бөлінді. Ауыл шаруашылығы тауарын өндірушілер үшін оның бір литрі 305-тен 310 теңгеге дейін тұрады, бұл нарықтық бағадан 10 пайызға төмен.

Еске сала кетейік, бұған дейін Ауыл шаруашылығы министрлігі ыстықтан кейін картоп пен басқа да көкөністердің тапшылығы туындау қаупіне баға берген болатын. Журналистер ауыл шаруашылығы вице-министрі Азат Сұлтановтан осы жаздағы ауа райының ауытқуы егінге және ішкі нарықты отандық өніммен қамтамасыз етуге әсер етпей ме деп сұраған еді. Оның бұл мәселеге қатысты пікірін осы материалдан оқи аласыздар.

Google News арқылы жаңалықтарымызды қадағалаңыз