Қазақтар үйді жаппай Астанадан сатып алып жатыр

Бірінші кредиттік бюро мамандарының мәліметінше, Қазақстандағы тұрғын үй нарығы 2025 жылды жоғары көрсеткішпен аяқтады, әсіресе елордада белсенділік айқын байқалды, – деп хабарлайды Aikyn.kz сайты.

Астана жыл қорытындысы бойынша да, желтоқсан айында да тұрғын үйді сатып алу-сату мәмілелерінің саны бойынша рекордтық көрсеткіш тіркеді.

ҚР Стратегиялық жоспарлау және реформалар агенттігінің Ұлттық статистика бюросы деректеріне сәйкес, желтоқсан айында елордада шамамен 11,7 мың мәміле жасалған. Бұл көрсеткіш қараша айымен салыстырғанда 32 пайызға, ал 2024 жылдың желтоқсанымен салыстырғанда 18 пайызға жоғары.

Аталған нәтиже кемінде 2018 жылдың басынан бергі абсолютті максимум саналады. Ал қаланың аумағы мен халқының айтарлықтай өсуін ескерсек, бұл көрсеткіш бақылау жүргізіле бастағаннан бергі ең жоғары деңгей болуы да мүмкін. 2025 жылдың қорытындысы бойынша Астанада жасалған мәмілелердің жалпы саны 93,5 мыңнан асты, бұл 2024 жылмен салыстырғанда 22 пайызға көп. Бұл да соңғы жылдардағы рекордтық деңгей.

Нарықтағы мұндай белсенділік 2025 жылы тұрғын үй бағасының бірнеше рет өсуімен, әсіресе алғашқы нарықта байқалған қымбаттаумен тұспа-тұс келді. Мұны бірқатар аналитикалық платформалардың деректері де растайды.

Алматыда да тұрғын үй нарығы 2018 жылдан бергі жылдық ең жоғары көрсеткішке жетіп, бір жылда 87,6 мың мәміле тіркелді. Алайда 2024 жылмен салыстырғандағы өсім бар-жоғы 5 пайызды құрады. Соған қарамастан, оңтүстік астанада алғашқы және қайталама нарықтағы бағаның өсуі әлдеқайда айқынырақ болды.

Желтоқсан айында Алматыда 9 мың мәміле тіркелген. Бұл абсолютті рекорд болмаса да, 2018 жылдан бергі ең жоғары айлық көрсеткіштердің бірі саналады және тек 2021 жылдың желтоқсан айындағы көрсеткіштен ғана төмен.