​ ҚазМұнайГаз тоғыз айда мұнай өндіруді 10%, газ өндіруді 20% арттырды

«ҚазМұнайГаз» ұлттық компаниясы» АҚ 2025 жылдың тоғыз айындағы өндірістік нәтижелерін жариялады.

Компания мәліметінше, өткен жылдың сәйкес кезеңімен салыстырғанда негізгі көрсеткіштер өсім көрсетті.

Мұнай және газ конденсатын өндіру – 10%-ға артып, 19,8 млн тоннаға жетті. 

Газ өндіру көлемі – 20,1%-ға өсіп, 8,6 млрд м³ болды. 

Көмірсутек шикізатын өңдеу – 11,7%-ға өсіп, 15,8 млн тоннаға жетті. 

Ал мұнай тасымалдау көлемі 1,1%-ға азайып, 62,5 млн тонна болды.

Өсімге Теңіз жобасы ықпал етті

Теңіз кен орнында мұнай мен газ өндіру көлемі 41,8%-ға артқан. Бұл өсім Болашақ кеңейту жобасы аясында үшінші буын зауытында өндіріс басталуымен байланысты. Қарашығанақта да аздаған өсім байқалған (+3,2%), ал Қашағанда керісінше – газ факторының жоғарылауына байланысты өндіріс 2%-ға төмендеген.

Мұнай өңдеу көлемі мен өнім шығару артты

Қазақстан мен Румыниядағы зауыттарда өңдеу көлемі 15,8 млн тоннаға жетті. Соның ішінде:

Қазақстандық МӨЗ-дерде өңдеу 3,7%-ға,

Ал румындық Petromidia және Vega зауыттарында 37%-ға артқан.

Мұнай өнімдері өндірісі де 13,5%-ға өсіп, 14,8 млн тоннаны құрады. Бензин шығару – 17%, дизель – 20% артқан.

Полипропилен өндірісі рекорд жаңартты

KPI зауытында полипропилен өндіру 68,4%-ға өсіп, 135 мың тоннаға жетті. Экспорт көлемі де 51,7%-ға ұлғайып, өнім Еуропа мен Түркия нарықтарына жөнелтілген.

«ҚазМұнайГаз» – Қазақстанның ұлттық мұнай-газ операторы. Компания барлау мен өндіруден бастап, тасымалдау, өңдеу және мұнай-химия өнімдерін өндіру салалары бойынша жұмыс істейді.

Бүгін, 17:43