ҚазТрансОйл соңғы жеті жылда 45 млн тоннадан астам мұнай тасымалдады

«ҚазМұнайГаз» ҰК АҚ Басқарма төрағасы Асхат Хасенов «ҚазТрансОйл» АҚ-да (ҚТО) жиналыс өткізді.
Жиын барысында 2025 жылы атқарылған қызметтің қорытындысы шығарылып, осы жылдың басым міндеттері айқындалды.

ҚТО бас директоры Арман Қасенов былтырдың қорытындысы бойынша компания еліміздің магистралды мұнай құбырлары жүйесінің тұрақты әрі үздіксіз жұмысын қамтамасыз еткенін баяндады.

 2025 жылы ҚТО-ның магистралды мұнай құбырлары жүйесі арқылы мұнай тасымалдау көлемі 45,1 млн тоннаны құрады, бұл соңғы жеті жылдағы рекордтық көрсеткіш. Мұнай жүк айналымы 36 млрд тонна-километрден асты.

2025 жылы отандық мұнай өңдеу зауыттарына жеткізілген мұнай көлемі – 18 млн тонна, бұл өткен жылмен салыстырғанда 4% жоғары болды.

«Батуми мұнай терминалы» ЖШҚ тобы және Petrotrans Limited компаниясы бойынша есептік кезеңде мұнай өнімдері мен газды қайта тиеу көлемі 1,9 млн тоннаны құрап, 2024 жылмен салыстырғанда 3% артты. Ал 2025 жылғы жүкті қайта тиеудің жалпы көлемі 7,2 млн тоннаға жетіп, өткен жылғы деңгейден 10% ұлғайды.

Әлемдік нарықтардағы қазіргі ахуал жағдайында ұлттық оператор мұнайды тұрақты тасымалдауды қамтамасыз ету, сондай-ақ тасымалдау бағыттарын одан әрі әртараптандыру бойынша белсенді жұмысты жалғастыруда.

 Жиын барысында ҚТО-дағы энергия тиімділігі жөніндегі жұмыстардың қорытындылары да қаралды. Технологиялық режимдерді оңтайландыру және жаңа тәсілдерді енгізу есебінен 9 млн м³ табиғи газ және 1 675 кВт·сағ электр энергиясы үнемделді. Экономикалық тиімділік 361 млн теңгені құрады, парник газдары шығарындысы 2,8 тоннаға қысқарды. Энергия ресурстарын тұтынуды азайту бойынша қабылданып жатқан жүйелі шаралардың нәтижесінде 2025 жылы мұнай жүк айналымына шаққандағы энергияның үлестік шығыны 2024 жылмен салыстырғанда 2,5% төмендеді. Ал 2010–2025 жылдар аралығында аталған көрсеткіш 60% азайды.

Бұдан басқа Мемлекет басшысы жариялаған «Цифрландыру және жасанды интеллект жылы» аясында ҚТО жасанды интеллект технологияларын қолдана отырып, бірқатар жобаларды іске асырмақшы. Атап айтқанда, құбырлардың тұтастығын басқарудың ақпараттық жүйесін енгізу көзделген. Бұл мұнай тасымалдаудың қауіпсіздігі мен сенімділігін арттырады, апат санын және жөндеу шығындарын азайтуға мүмкіндік береді, сондай-ақ өнеркәсіптік және экологиялық қауіпсіздік талаптарының сақталуын қамтамасыз етеді.

Сонымен қатар компания өндірістік алаңдарында қызметкерлердің әлеуметтік-тұрмыстық жағдайларын жақсарту бағытындағы жұмыстарды жалғастыруда. 2025 жылы 10 мың шаршы метрден астам әлеуметтік-тұрмыстық үй-жайлар жаңартылып, жаңа ғимараттар пайдалануға берілді.