Алтай мен Алатау танкерлері жыл басынан бері 2,5 млн тоннадан астам мұнай тасымалдады

2025 жылдың қаңтар-қазан айлары аралығында Қазақстанның жетекші мұнай танкерлері — «Алтай» мен «Алатау» — 2,5 миллион тоннадан астам мұнайды халықаралық нарықтарға жеткізді. Бұл туралы «ҚазМұнайГаз» ұлттық компаниясының еншілес ұйымы — «Қазақтеңізкөлікфлоты» ҰТКҚК» ЖШС хабарлады.

Aframax санатындағы «Алтай» мен «Алатау» танкерлері ұлттық теңіз флотының тірегі саналады. Олар Қазақстан мұнайының жаһандық нарықтарға үздіксіз жеткізілуін қамтамасыз етіп келеді.

2025 жылдың он айының қорытындысы бойынша:

«Алтай» танкері 1 млн 295 мың тоннадан астам мұнай тасымалдап, 2024 жылғы көрсеткіштен (1 млн 184 мың тонна) асып түсті; «Алатау» танкері де өсім көрсетіп, 1 млн 283 мың тоннадан астам мұнай жеткізді (2024 жылы — 1 млн 222 мың тонна).

2011 жылдан бері бұл екі танкер 100 млн тоннадан астам мұнай тасымалдап үлгерді. Бұл көрсеткіштер Қазақстанның сенімді экспорттаушы ретіндегі беделін арттырып, ұлттық теңіз тасымалдаушысының өңірлік энергетикалық қауіпсіздікті қамтамасыз етудегі маңызын айқындайды.

«Қазақтеңізкөлікфлоты» флотты жаңғыртып, тасымал бағыттарын кеңейту арқылы қазақстандық мұнайдың халықаралық нарықтарға тиімді әрі тұрақты жеткізілуін қамтамасыз етуді жалғастырады», — делінген компания хабарламасында.

Бүгін, 12:32