КҚК арқылы жыл басынан бері 26 млн тоннаға жуық мұнай экспортталды

Каспий Құбыр Консорциумы (КҚК) биылғы жылдың басынан 24 мамырға дейін Новороссийск маңындағы теңіз терминалы арқылы 25,95 млн тонна мұнай жөнелтті.
Осы кезеңде 206 танкерге мұнай тиелген. Бұл туралы консорциум мәлімдеп, ақпаратты Reuters агенттігі таратты.

КҚК дерегінше, 2026 жылы қолайсыз ауа райына байланысты теңіз терминалындағы жүк операциялары жалпы саны 680 сағатқа тоқтатылған. Сонымен қатар түрлі қауіп-қатерлер салдарынан мұнай жөнелту жұмыстары белгілі бір уақыт аралығында жүргізілмеген.

Бұған дейін Reuters агенттігінің дереккөздері консорциум сәуір айында мұнай экспортын наурызбен салыстырғанда 5 пайызға арттырғанын хабарлаған еді.

Каспий Құбыр Консорциумы 2026 жылы мұнайды ауыстырып тиеу көлемін ұлғайтуды жоспарлап отыр. Жоспар бойынша көрсеткіш 2025 жылғы 70,5 млн тоннадан 72 млн тоннаға дейін жеткізілмек.

Қазақстанның экспорттық мұнайының 80 пайыздан астамы дәл осы КҚК жүйесі арқылы тасымалданады. Оның негізгі бөлігі Теңіз, Қашаған және Қарашығанақ секілді ірі кен орындарында өндіріліп, Новороссийск маңындағы Южная Озереевка терминалында танкерлерге тиеледі.

Консорциум акционерлері қатарында Ресей 31 пайыз үлеспен жетекші орында тұр. Қазақстанның үлесі – 20,75 пайыз, ал Chevron компаниясына 15 пайыз тиесілі. Бұдан бөлек, құрылым құрамында өзге де жеке компаниялар бар.

Еске салсақ, 2026 жылдың бірінші тоқсанында Қазақстан 8 млрд доллар көлемінде шикі мұнай экспорттаған болатын.