Қоғам жаңа Конституцияны Қазақстанның мұнан арғы тұрақты дамуының негізі ретінде қолдады Айжан Қиясова

— Негізгі заңды қабылдау жайында сөз қозғалғанда қоғамды біріктіретін құндылықтар айрықша айқын көрінеді. 15 наурыздағы референдум дәл осындай сәттердің біріне айналды. Ол Қарағанды облысының тұрғындары болашақ мәселелерін байыппен, терең ойланып және жоғары жауапкершілік сезімімен қабылдайтынын көрсетті. Орталық сайлау комиссиясының алдын ала деректеріне сәйкес, Қарағанды облысында жаңа Конституцияны қолдау деңгейі 83,82 пайыз болды. Ал дауыс беруге қатысу деңгейі 84 пайыздан асты. Мұндай деректер адамдардың саналы түрде қатысқанын, ел тағдырына қызығушылық танытқанын және мемлекеттілікті нығайту мен стратегиялық дамуды қолдау бағытына дайын екенін көрсетеді, — деп жазды ол Facebook-тегі парақшасында. 

Оның пайымынша, мұндай нәтижеге үлкен әрі жүйелі жұмыстың арқасында қол жеткізілді. Нақтырақ айтқанда, аймақтық коалицияның аясында бір ай ішінде облыста 800 мыңға жуық адамды қамтыған 4 мыңнан астам іс-шара өтті. Әлеуметтік желілерде, баспа материалдарында, диалог алаңдарында және тікелей кездесулер барысында кең ауқымды ақпараттық жұмыс жүргізілді.

— Қарағанды өңірі үшін мұндай қолдау заңдылық. Мұнда әрқашан еңбек, өзара қолдау, бірлік пен ортақ іске құрмет жоғары бағаланған. Бұл қасиеттер қоғамның ерекше сипатын қалыптастырады. Онда бейжай қарамау да, тұрақтылықтың қадірін түсіну де, болашақ ұрпақ алдындағы жауапкершілік сезімі де бар. Сондықтан біздің өңірде референдум жоғары белсенділікпен өтті, — деді Айжан Қиясова.

Кеңес төрағасы қазіргі кезде әлем күрделі өзгерістер мен тұрақсыздық кезеңін бастан өткізіп отырғанына назар аудартады.

— Осындай жағдайда кез келген қоғам үшін ішкі бірлік, егемендік және берік мемлекеттік негіздердің құндылығы арта түседі. Адамдар мұны жақсы түсінеді. Сондықтан жаңа Конституция елдің негізгі тіректерін бекітетін, оның саяси тұрақтылығын күшейтетін және дамудың анағұрлым айқын моделін қалыптастыратын құжат ретінде қабылданды. Мұндай кезеңдерде қоғамдық таңдау бірлікке бағытталып, өз мемлекетімізді нығайтуға қызмет етуі аса маңызды. Сонымен қатар қоғам жаңа Конституцияны Қазақстанның мұнан арғы тұрақты дамуының негізі ретінде қолдады деп ойлаймын. Енді конституциялық нормаларды іс жүзінде жүзеге асырумен, олардың заңнамада, мемлекеттік институттарда және күнделікті өмірде көрініс табуымен байланысты ең жауапты кезең басталады. Әділдікке, тәртіпке, отбасын қорғауға және адамға құрмет көрсетуге деген осы қоғамдық сұраныс мемлекеттік саясатта толыққанды жалғасын табуы өте маңызды, — деді ол.

Айта кетейік, бүгін Орталық референдум орталық комиссиясы республикалық референдумдағы дауыс берудің алдын ала нәтижелерін жариялады. Оған сәйкес, дауыс беруге қатысқан азаматтардың саны — 9 млн 127 мың 197 адамды немесе референдумға қатысуға құқығы бар азаматтар санының 73,12 пайызын құрады. Осылайша жаңа Конституцияны қабылдау туралы мәселенің оң шешімін жақтап, дауыс берген азаматтар саны еліміздің барлық өңірінде дауыс беруге қатысқан 7 млн 954 мың 667 адам немесе 87,15 пайыз болды.