Ерлан Карин: Жаңа қоғамдық этика Қазақстанның тұрақты дамуының негізгі шарты

Жаңа қоғамдық этиканы қалыптастыру елдің тұрақты дамуы мен өркендеуінің басты алғышарттарының бірі. Қазақстан Республикасы Президенті Әкімшілігі басшысының бірінші орынбасары Ерлан Карин осындай пікір білдірді.

Оның айтуынша, қазіргі қоғамдағы көптеген дау-дамай мен кикілжің азаматтардың қарапайым әдеп нормаларын сақтамауынан, бір-біріне құрметпен қарамауынан туындайды.

«Қоғамдағы кез келген кикілжіңнің я даудың алдын алудың бірден бір жолы – жеке бастың мәдениетін дамыту. Бұл – бір-бірімізге сыйластықпен қарау, өз ісімізге адал болу, заңды құрметтеу, тазалық пен тәртіпті сақтау», – деп жазды Ерлан Карин.

Ол ұлт сапасын арттыру мен азаматтардың мінез-құлқын өзгерту ұзақ мерзімді әрі жүйелі жұмысты талап ететінін атап өтті. Оның пікірінше, мұндай нәтижеге жалаң үгіт-насихат арқылы емес, нақты қадамдар арқылы ғана қол жеткізуге болады.

Кариннің сөзінше, Мемлекет басшысы Қасым-Жомарт Тоқаевтың тапсырмасымен бұл бағытта бірқатар нақты шара қабылданған. Атап айтқанда, мектептерде «Адал азамат» бірыңғай тәрбие бағдарламасы енгізілді, вандализмге қарсы заң қабылданды, табиғи нысандарды қорғау талаптары күшейтілді. Сонымен қатар қоғамдық орындарда бетті тұмшалап жүруге қатысты заңнамалық норма енгізіліп, бейәдеп сөз айтуға және әлеуметтік желілерде азаматтардың ар-намысы мен қадір-қасиетін қорлағаны үшін жауапкершілік күшейтілді.

Президент Әкімшілігі басшысының бірінші орынбасары жаңа қоғамдық этиканы қалыптастыруда құқықтық тетіктердің де маңызы зор екенін айтты.

Айта кетейік, соңғы күндері Ішкі істер министрлігі әлеуметтік желіде хайп үшін заң бұзатын қолданушылар мен қауіпті пранк ұйымдастырушыларды жауапкершілікке тартып, олардың әрекеттерін ашық жариялай бастады.

«Құқық бұзушыларға қатысты мұндай шараларды қолдану өзгелерге сабақ болатыны анық», – деді Ерлан Карин.