Қош келдің, қорқынышты ChatGPT Astra

OpenAI жариялаған презентацияның негізінде Aikyn.kz GPT-6 Astra-ның мүмкіндіктері мен жаңа модельге қатысты қауіпсіздік мәселелерін талдайды.

GPT-6 Astra 3 қыркүйекте таныстырылды. OpenAI оны осы уақытқа дейінгі ең интеллектуалды әрі қауіпсіздік талаптарына барынша сәйкестендірілген модель деп сипаттайды. Компанияның мәліметінше, Astra компьютерді басқару, бағдарламалау, киберқауіпсіздік, ғылыми зерттеулер және кәсіби міндеттерді орындау сияқты бағыттар бойынша таңғаларлық нәтижелер көрсеткен.

Жаңа модельдің басты ерекшеліктерінің бірі – компьютерлік ортада өздігінен әрекет ету қабілетінің күшеюі. Astra онлайн формаларды толтыру, күнтізбені реттеу, зерттеу жүргізу, электрондық пошта немесе құжат редакторында мәтін дайындау сияқты жұмыстарды атқара алады. Ол ғылыми деректерді талдап, графиктер жасайды, кодтар жазады, оны орнатып, тексереді.

OpenAI мәліметінше, компьютерді пайдалану тапсырмаларын орындау жылдамдығы да айтарлықтай өскен. OSWorld 2.0 сынағында Astra тапсырманы орта есеппен шамамен 40 минутта орындап, 72,6% нәтиже көрсеткен. Салыстыру үшін GPT-5.6 Sol-ға шамамен 75 минут қажет болып, оның көрсеткіші 65,7% болған. Яғни, Astra бұл сынақтағы тапсырмаларды шамамен 47% аз уақытта орындаған.

Модель күрделі бірнеше кезеңнен тұратын тапсырмаларды орындап, дайын құжаттар, кестелер, презентациялар мен талдаулар әзірлейді. OpenAI Astra-ның бұрынғы модельдерге қарағанда нұсқаулардың контекстін жақсырақ түсінетінін және күнделікті ұсақ шешімдерді өздігінен қабылдайтынын айтады. Ал салдары маңызды шешімдерде модель пайдаланушының жауабын күтуге тиіс.

Бұл шынымен адаммен теңесетін Жалпы ЖИ ма? Astra-ны таныстыруда жасалған ең үлкен мәлімдеме оның техникалық көрсеткіштерінен де ауқымды болды. Брокман жаңа модельді адамның әртүрлі интеллектуалдық міндеттерді орындау қабілетіне жақындайтын жалпы мақсаттағы жасанды интеллект (AGI) дәуірінің басталуымен байланыстырды. Әзірше, OpenAI Astra-ны ресми түрде «AGI-ге жеттік» деп жариялаған жоқ және соңғы бағалауды пайдаланушыларға қалдырып отыр.

Модель бірқатар күрделі тесте өте жоғары нәтиже көрсеткен. OpenAI жариялаған деректер бойынша, Astra ARC-AGI-3 сынағында 99,9%, FrontierMath Tier 4 тестінде 98% және ExploitBench киберқауіпсіздік сынағында 100% көрсеткішке жеткен. Алайда жеке тестердегі жоғары нәтижелердің өзі AGI-дің пайда болғанын ғылыми тұрғыдан біржақты дәлелдей алмайды.

Astra мүмкіндіктерінің артуы қауіпсіздік мәселесін де алдыңғы қатарға шығарды. Reuters мәліметінше, модельдің жұмыс істеу тәсілдерін бақылау барған сайын күрделене түсуде.

Қуатты ЖИ жүйелері кей жағдайда мәселені қалай шешкенін жасырады, олардың ішкі әрекетін түсіну де қиын. OpenAI осыған байланысты автоматты түрде жұмысты тоқтату тетіктерін және қосымша қауіпсіздік шараларын зерттеу үстінде.

Киберқауіпсіздік саласында да шектеулер бар. Astra OpenAI-дің ең жоғары киберқауіп деңгейіне жеткен алғашқы модель болды. Сондықтан оның ең қуатты кибермүмкіндіктерінің бір бөлігі әзірге сенімді тестілеушілер тобына ғана берілді. GPT-6 Astra уақытша шектеулі ұйымдар тобына ұсынылған. OpenAI алдағы күндері оны ChatGPT Plus, Pro, Business және Enterprise пайдаланушыларына, сондай-ақ API арқылы кезең-кезеңімен қолжетімді етуді жоспарлап отыр.