Қостанайда субсидияны жымқырған 15 адамға сот үкімі шықты

АСТАНА, 9 сәуір – Sputnik. Қостанайда мемлекеттік субсидияны жымқырып, қылмыстық жолмен алынған кірісті заңдастырған 15 адамға сот үкімі шықты, деп хабарлады Қаржылық мониторинг агенттігі.

Beef Export Group" ЖШС басшысы Пархоменко жетекшілік еткен қылмыстық топ субсидияларды заңсыз алу схемасын ұйымдастырған. Оған ауыл шаруашылығы басқармасының лауазымды тұлғалары, аудандық деңгейдегі ауыл шаруашылығы тауар өндірушілері мен ветеринариялық мамандар қатысқан.

"Қаскөйлер ірі қара малды сатып алу және оны қайта өңдеу туралы құжаттарды жалған рәсімдеу арқылы агроөнеркәсіптік кешенді дамытуға арналған мемлекеттік бағдарлама аясында жүйелі түрде субсидия алып отырған", - деп жазылған хабарламада.

Түскен қаражаттар сатып алынған малға төленгендей көрсетіліп, ақпараттық жүйелерге енгізілгеннен кейін қолма-қол ақшаға айналдырылып, бақылаудағы ұйымдардың шоттарына қайта аударылған.

"Салдарынан мемлекетке 3 млрд теңгеден астам залал келтірілді. Тергеу барысында күдіктілер 107 млн теңгеден астам қаражатты ерікті түрде өтеді", - дейді ведоство мамандары.

Сот үкімімен ұйымдастырушы Пархоменко А.Г. 14 жылға бас бостандығынан айырылды. Қылмыстық топтың 14 қатысушысына 6 жылдан 10 жылға дейін бас бостандығынан айыру жазасы кесілді.

Сонымен қатар, жалпы құны 3 млрд теңге болатын мүлік, оның ішінде 1,3 млн АҚШ доллары және 700 млн теңге тәркіленді. Үкім заңды күшіне енген жоқ.