Қостанайлық ұландықтар жоғалған жасөспірімді іздеуге жұмылдырылды

Қостанай қаласында 17 наурыз күні жоғалып кеткен жасөспірімді іздестіру жұмыстарына Ұлттық ұланның 6697 әскери бөлімінің әскери қызметшілері белсенді түрде қатысуда, – деп хабарлайды Aikyn.kz сайты.

Іздеу шараларына шамамен 120-ға жуық қостанайлық гвардияшы жұмылдырылды.

Әскери қызметшілер құқық қорғау органдары және еріктілермен бірлесе отырып, қала аумағын, саябақтарды, қараусыз қалған ғимараттарды және өзге де ықтимал орындарды мұқият тексеруде. Іздеу жұмыстары тәулік бойы жүргізіліп, әрбір бағыт бойынша нақты міндеттер белгіленген.

Ұландықтар жергілікті жерді секторларға бөліп, жүйелі түрде тексеру жүргізуде. Сонымен қатар, тұрғындардан келіп түскен кез келген ақпарат жедел түрде қарастырылып, тексерілуде.

Ұлттық ұланның әскери қызметшілері әрдайым қоғамдық қауіпсіздікті қамтамасыз етумен қатар, осындай маңызды іздестіру шараларында да жоғары жауапкершілік пен ұйымшылдық танытып келеді. Қостанайлық ұландықтар бұл жолғы әрекеті олардың халықпен бірге екенін, қиын сәтте көмекке дайын екенін тағы бір мәрте дәлелдеді.

Іздеу жұмыстары жалғасуда. Құзырлы органдар азаматтарды бейжай қалмай, қандай да бір ақпарат болған жағдайда дереу хабарлауға шақырады.