Қ.Тоқаев АҚШ қа барады

Вашингтонда Орталық Азия-АҚШ форматындағы саммит өтеді. Жиынға мемлекет басшысы Қасым Жомарт Тоқаев қатысады. Президент Ақ үйде Дональд Трамппен кездеседі. Қазір сарапшылар, саясаткерлер мұнда қандай мәселелер қозғалатынын жарыса талқылап жатыр.

Америкалық сарапшылардың айтуына қарағанда, бұл - АҚШ үшін стратегиялық маңызы бар іс-шара. Трамп әкімшілігі бұл орайда: «Президент бірінші мерзімі кезінде айқын ұстаным қалыптастырған. Енді ол сол саясатын одан әрі жалғастырады», - дейді. 

Эрик Руденшильд, Каспий істері жөніндегі ғылыми қызметкер:

Бұл кездесу өңірді жаһандық деңгейге көтеруге, экономиканы Батысқа бағыттауға жол ашады. Солтүстікке Ресей арқылы, шығысқа Қытай арқылы шығу оңай, бірақ Батысқа жету үшін инвестиция қажет. Бұл саммит Орталық Азия елдері үшін АҚШ-пен ең жоғары деңгейде байланыс орнатуға жол ашады. 

Бұл саммит ынтымақтастыққа жаңа серпін береді. «Жиында Қазақстан Құрама Штаттармен ірі келісімдер жасауға тиіс. Өйткені Қазақстан АҚШ-тың Орталық Азиядағы негізгі серіктесі», - дейді сарапшылар. 

Ариэль Коен, Atlantic Council сарапшысы:

- АҚШ-та аса мұқтаж болып отырған сирек металдар мәселесі көтерілуі мүмкін. Осы тұрғыда Қазақстанның рөлі айрықша. Өйткені Қазақстанның жер қойнауында Менделеев кестесіндегі барлық элемент бар. Бұл - Қазақстан үшін мұнай мен уран экспорттаушы ғана емес, сирек металдардың да жетекші экспорттаушысына айналуына зор мүмкіндік. Менің компаниям клиенттерге Орталық Азияға инвестиция салу бойынша кеңес береді. Өзім үнемі Астана халықаралық қаржы орталығын мысал етемін. Себебі онда ағылшын заңдылықтары қолданылады. Болашақ бағдарламасының түлектері жұмыс істейді. Басқа елдер де Қазақстанға қарап, соған ұмтылып келеді. Дәл қазір Қазақстан - аймақтың сөзсіз көшбасшысы.