ҚТЖ мен Ресей темір жолдары локомотив алмасу мәселесін қарастырды

АСТАНА, 22 наурыз – Sputnik. Мәскеуде қозғалыс қауіпсіздігі жөніндегі комиссияның кезекті отырысы өтті.

Іс-шараға ҚТЖ және Ресей темір жолдарының, сондай-ақ Әзербайжан, Беларусь, Өзбекстан және басқа елдердің теміржол әкімшіліктерінің өкілдері қатысты.

Кеңес аясында "ҚТЖ "ҰК" АҚ басқарма төрағасының орынбасары Марат Шәкенов "Ресей темір жолдары" ААҚ бас директорының бірінші орынбасары Сергей Павловпен трансшекаралық тасымалдардың тиімділігін арттыру үшін локомотивтермен алмасу мәселесін талқылады.

"Атап айтқанда, локомотивтердің кедергісіз өтуін қамтамасыз ету бойынша Ресей темір жолдарының өтініші қаралды. Сондай-ақ тараптар транзиттік пойыздарды ілгерілету мәселесін ойдағыдай пысықтады, бұл жеткізу мерзімін қысқартуға және инфрақұрылымға жүктемені оңтайландыруға мүмкіндік береді", - деп хабарлады ҚТЖ.

Сондай-ақ кеңесте тасымалдардың сенімділігін қамтамасыз ету және ТМД елдерінің көлік ведомстволарының іс-қимылдарын үйлестіру мәселесі талқыланды.

"Нормативтік-техникалық реттеу жөніндегі сараптама тобының жаңартылған құрамы бекітілді. Топ қауіпсіздік стандарттарын үйлестіру және темір жол көлігінде заманауи техникалық регламенттерді енгізу бойынша жұмысты жалғастырады", - дейді ҚТЖ.

Бұдан басқа, елдер темір жол әкімшіліктерінің арасында деректер алмасу мәселелері бойынша өзара іс-қимылды нығайтуға ниетті.