​Құлсары теміржол вокзалы күрделі жөндеуден өтті

Атырау облысының Жылыой ауданында орналасқан Құлсары теміржол вокзалы толық күрделі жөндеуден өтті. Бұл туралы Өңірлік коммуникациялар қызметі хабарлайды.

2017 жылы салынған жаңа вокзал ғимараты бүгінде қайта жаңғыртылды. Күрделі жөндеу жұмыстары аясында вокзалдың ішкі бөлігі түгелдей жаңартылып, жолаушылар мен қызметкерлерге қолайлы жағдай жасалды.

– Қазір вокзалдың негізгі жұмыстары толық аяқталды. Сыртқы аумағына қосымша жер алынып, онда абаттандыру жұмыстары жүргізілуде. Жалпы мәлімет үшін айта кетсек, Құлсары қаласындағы теміржол вокзалының алғашқы ғимараты 1970 жылы салынған. Құжаттары толық рәсімделгеннен кейін жаңа ғимаратты «Қазақстан темір жолы» балансына беруді жоспарлап отырмыз. Осыдан кейін бұрынғы ескі ғимаратта жұмыс істеп келген қызметкерлер жаңа ғимаратқа көшіріледі, – деді Жылыой ауданының әкімі Жұмабек Қаражанов.

Қазіргі уақытта абаттандыру жұмыстары толық аяқталып, нысанды пайдалануға беру бойынша құжаттар рәсімделуде.

Бүгін, 17:38