Құрық Жетібай тас жолы күрделі жөндеуден өтті

Республикалық маңыздағы трасса Маңғыстау облысының Қарақия ауданындағы ірі екі ауылды жалғайды.

Жалпы ұзындығы 64 шақырым жолмен транзиттік жүк тасымалы толассыз жүріп жатыр. Бұрын жүк көліктері Құрық портына Ақтау арқылы баратын. Енді теңіз айлағына Жетібай ауылынан тіке шығып, 120 шақырым үнемдейді.

«Құрық-Жетібай» трассасы тәуелсіздік алғалы жөндеу көрмеген еді. Тозығы жеткен жолды қалпына келтіру жұмыстары 2021 жылы басталды. Алдымен 24 шақырымына асфальт төселді. Қалған 40 шақырымындағы құрылыс жақында аяқталып, Құрық пен Жетібай ауылдары арасындағы қоғамдық көлік қатынасы жанданды.

Құдайберген Төребаев, Жетібай ауылының тұрғыны:

- Қотыр жол болды, оқуға да кешігіп келетін едім. Бір күн бұрын келетін едім. Сөйтіп, асфальт төселгеннен кейін қазір автобус қатынайды. Қазір оқуыма да үлгіремін. Ауылға да барамын. 

Жоба құрылысына республика бюджетінен 11,5 млрд теңге жұмсалды.Толық жөндеуден соң трассаның көрсеткіші 8 тоннадан 13 тоннаға дейін ұлғайды. Жол бойы жарықтандырылып, жаяу жүргіншілер жолағы мен теміржол өткелі салынды. Жолға мал шығып кетпеуі үшін 27 шақырым аумақта қоршау қойылды.

Қазбек Мамбетов, "Қазавтожол"  ҰК Маңғыстау облыстық филиалының директоры:

- Біздің аймақтан шығатын үлкен жолдардың біреуі. Күре тамыры. Басқа облыстарға шығып кететін осы жол. Порттан Әзербайжан болсын. Түркіменстаннан келген жүктерді тасымалдауға өзінің себебін тигізеді. Айналма жолы бар. Ауылдың ішімен өтпей, жүк көліктерінің айналып өтуіне ықпал етеді. 

«Құрық-Жетібай» трассасы халықаралық көлік дәлізінің маңызды бөлігі. Өзбекстан, Ресейден келетін транзиттік жүктер осы жолмен Құрық портына келеді. Одан әрі Әзербайжан арқылы Еуропаға жөнелтіледі.

Талғат Исламұлы, Саламат Бекбаев, Ренат Досалиев