Құрылтай жалпыұлттық деңгейдегі ашық диалог алаңы ретінде қызмет етуі тиіс Тоқаев

Парламент палаталарының бірлескен отырысында Қасым-Жомарт Тоқаев Құрылтай технологиялық прогрестің жетекші факторы болады деген үмітін айтты, – деп хабарлайды Aikyn.kz. сайты Akorda-ға сілтеме жасап.

Мемлекет басшысы Қасым-Жомарт Тоқаев былтыр қазан айында өткен Парламенттік реформа жөніндегі жұмыс тобының алғашқы отырысында толыққанды e-Parliament жүйесін енгізу мәселесін көтергенін тілге тиек етті. 
– Қазақстан e-Government, яғни электрондық үкіметтің даму деңгейі бойынша жаһандық рейтингте әлемдегі үздік 25 елдің қатарына кірді. Енді электрондық Парламентті қалыптастыруға және дамытуға көп күш-жігер жұмсауымыз қажет.  
Жаңадан сайланған депутаттар заң шығару ісінде болжамды сараптамаға, Үлкен дерекқорды басқару арқылы кез келген шешімнің экономикалық салдары мен әлеуметтік тәуекелдерін модельдеуге баса мән беруі керек. Маңызды заң жобаларын сарапшылармен және жауапты қоғам белсенділерімен бірге талқылаған жөн. Цифрлық құралдарды пайдалану қажет. Бұл пікірталасқа қатысушылар санын көбейтіп, мәселені нағыз қоғамдық талқыға салуға мүмкіндік береді.
Құрылтай жалпыұлттық деңгейдегі ашық диалог алаңы ретінде қызмет етіп, қоғамды толғандырған өзекті мәселелерге дер кезінде назар аударуы қажет. Бұл – азаматтардың дәйекті өтініштері міндетті түрде ескеріліп, нақты нормативтік құқықтық актілерді қабылдау арқылы мемлекеттік мекемелерге тиісті тапсырмалар берілуі керек деген сөз, – деді Қасым-Жомарт Тоқаев.