Құрыш білекті металлург

Ұлытаулық металлург Әбдірашит Доспановтың  еңбек  жолы құрыш құйған кейінгі жас буынға үлгі.

Ол Жезқазған мыс қорыту зауытында 40 жыл бойы табан аудармай тер төгіп келеді. Осы аралықта соңынан ерген жастарға тәлім беріп, жол көрсетті. Еңбек қауіпсіздігін ең бірінші орынға қоятын маманның бригадасы биыл да ұжымдар арасында үздік атанды.

Ұяда не көрсе-ұшқанда соны іледі» деген тәмсіл бекер айтылмаса керек. Әбдірашит Доспановтың әкесі Қойшыбек ақсақал елге еңбегі сіңген металлург. Бұл әулеттің өндірістегі жолы металлургияның қарашаңырағы - Қарсақбайдан басталған. Әке жолын жалғаған ұл металлургияны таңдады. Қатардағы балқытушыдан бастап ауыр еңбектің түрлі сатысынан өткен. Қазір балқытушылар бригадасының басшысы.

Әбдірашит Доспанов, металлург:

- Әрине, басында жұмысқа тұрғанда қиын болды. Шаң, газ. Содан міне шығам, әне шығам деп жүргенде 40 жыл болғанын да білмей қалыппыз. Жұмыс жазда ыстық, одан шаршап шығасың. Бірақ жұмыста жуынып шыққан соң жұмыс істемеген адамдай қайта ойнап-күліп үйге кетеміз.

Әбдірашит басқаратын бригада мыс қорыту барысын бақылап, пештердің іркіліссіз жұмыс істеуін қадағалайды. Мың градус ыстықта балқыған кеннің құрамындағы металл мен шлакты бөліп алады. Әбдірашит Доспанов негізгі жұмысынан бөлек қарамағындағы жұмысшылардың қауіпсіздігіне де тікелей жауапты. Бозбала күнінен болат балқытқан ол «қауіпті жұмыс бүгінде қалыпты өмірге айналды» дейді.

Әбдірашит Доспанов, металлург:

- Мен мысалы, жастық шағым қайтып келсе, қайтадан осы мамандықты таңдар едім. Енді бұдан басқа жұмыс істеу білмейтін сияқтымын. Құрылыста істеу білмеймін, жүргізуші бола алмаймын, тек мыс балқытумен айналысамын.

Өндірісте ең басты талап – қауіпсіздік. Кәсібіне адал, әріптестері алдында үлкен жауапкершілік арқалаған металлургті ұжымдастары да ерекше бағалайды. Қауіпсіз еңбектің арқасында балқытушылар цехы биыл кәсіпорындар арасында өткен байқауда ең үздік ұжым атанды.

Ибрахимхалил Дүйсенбаев, Мыс қорыту зауытының ауысым шебері:

- Әбдірашит Қойшыбекұлын баяғыдан танимын. Жұмысына тыңғылықты, адал. Бір ұжымды басқарып келе жатыр. 20 жылдан асып кетті. Үздіктердің қатарында. Негізі балқыту цехының бәрі үздік деп айтуға болады. Жұмысты көріп тұрсыңдар қандай екенін. Алдағы қатарда жүрген жігіттердің бірі ғой.

«Адал еңбектің арқасында кезкелген мақсатқа қол жеткізуге болады» дейді Әбдірашит Доспанов. Металлургтер жолын абыройлы жалғап келе жатқан ол осыған дейін үш мәрте «Еңбек даңқы» медалімен наградталған.

Авторлары: Елдос Кәкенов, Нұрлан Исмаилов, Нұрбол Үздікбаев