Қырғызстан президенті соңғы кадрлық шешімдер неден туындағанын түсіндірді

Садыр Жапаров Кабар агенттігіне  берген сұхбатында түсіндіргендей, ол досы Камчыбек Ташиевті қорғау үшін уақтылы және жедел шешім қабылдады.

- Өйткені оның айналасындағылар, менің досымды тура жолдан адастырып жүрді. Олар Камчыбек Ташиевтің атын жамылып, парламент депутаттарына, жоғары лауазымды қызметкерлерге және қоғамда танымал тұлғаларға «Генерал жағына өтіңдер» деп үндеу тастай бастады, - деп түсіндірді ол.

Қырғыз көшбасшысының айтуынша, бұл мемлекеттік аппарат пен қоғам арасында келіспеушілікке әкелуі мүмкін еді.

- Сондықтан мен досымды қызметінен босату туралы шешім қабылдауға мәжбүр болдым. Мемлекеттегі тұрақтылық мен үшін ең жоғары, - деп атап өтті ол.

Қырғызстан президенті Камчыбек Ташиевті қызметінен босату кезінде оған алдын ала хабарласып, жағдайды түсіндіргенін мәлімдеді.

Оның айтуынша, бұл шешім мемлекет пен халықтың тыныштығы мен бірлігі үшін қабылданды. Ол сондай-ақ достықты лауазыммен немесе кез келген мүддемен байланыстыру дұрыс емес екенін атап өтіп, Ташиевпен достық қарым-қатынасы сақталатынын қосып өтті.

Жапаров сонымен қатар ҰҚМК реформалау мәселесіне қатысты түсінік беріп, орган өзіне жүктелген тапсырманы толық орындағанын атап өтті.

- Мемлекет – тірі организм, ол үнемі дамып, өзгеруі тиіс. Егер кеше ұлттық қауіпсіздік алдында бір қиындықтар болса, бүгінде олар мүлдем басқа. Осы шындықтарды ескере отырып, ҰҚМК-де қазіргі заманғы қауіптер мен жаһандық өзгерістерге төтеп беретін кешенді реформа жүргізіледі. Әлем өзгеріп жатыр, және біздің мемлекеттік институттарымыз соған сәйкес алға жылжып, жаңартылуы тиіс, - деді ол.

Қырғызстан басшысы сонымен қатар кадрлық тағайындауларда ешқандай бөліну жоқ екенін және әрбір тағайындау мұқият тексеріліп жатқанын қосып өтті.

- Заң әрқашан күшінде болды және өз күшінде қала береді. Ешбір мемлекеттік қызметкерге заңды бұзуға немесе жеке мүддесі үшін қандай да бір әрекет жасауға рұқсат етілмейді. Егер арнайы қызметтің немесе басқа мемлекеттік органның жекелеген өкілдерінің заңды бұзып, өз өкілеттіктерін асыра пайдаланғаны анықталса, олар міндетті түрде тергеліп, жауапқа тартылады. Заң алдында бәріміз бірдейміз, - деп мәлімдеді Жапаров.

Осыған дейін Қырғызстанның ҰҚМК басшылық құрамында ауыс-түйіс болғанын хабарладық. https://kaz.inform.kz/news/kirgizstannin-ukmk-basshilik-kuraminda-auis-tuys-boldi-295516/

Сондай-ақ Қырғызстанда Президент жанынан Мемлекеттік күзет қызметі құрылып, Шекара қызметі ҰҚМК құрамынан шығарылып, Қырғыз Республикасының Мемлекеттік шекара қызметі ретінде дербес құрылымға айналды.