Қытай билігі Тайваньға басып кіруге соңғы кедергіні жойды The Wall Street Journal

Қытай басшысы Си Цзиньпин армиядағы соңғы ықпалды генералды қызметтен шеттетіп, қарулы күштерге толық бақылау орнатты. The Wall Street Journal жазуынша, бұл Қытай ішінде Тайваньға қарсы әскери қадамға тосқауыл қоя алатын беделді тұлғалардың қалмағанын көрсетеді.

Басылымның мәліметінше, Сиге жақын болған генерал Чжан Юсяның тұтқындалуы Тайвань мәселесінде қарсы пікір айта алатын соңғы ықпалды дауысты жойды. Ресми себеп — жемқорлық пен АҚШ-қа құпия ақпарат беру деген айып. Алайда бейресми нұсқада Чжан мен Си Тайваньға соғысқа дайындық мерзімі жөнінде келіспеген: Си 2027 жылды мақсат етсе, Чжан 2035 жылды шынайы деп санаған.

Батыста 2027 жыл Қытайдың Тайваньға ықтимал басып кіру уақыты ретінде қарастырылады. WSJ дереккөздері Чжанды шеттету Сидің «қайта біріктіру» жоспарына сенімі бұрынғыдан да артқанын және бұл сенім енді армияға толық бақылаумен бекітілгенін айтады.

Сонымен қатар Пекин Вашингтонның Тайваньды қорғауға дайындығын қайта бағалап отыр. Қытай билігі Дональд Трамптың Тайвань бұғазындағы ірі соғысқа араласуға құлықсыз деп есептейді.