Қытай ми компьютер технологияларын дамытуды жеделдетіп жатыр

Соңғы жылдары Қытай бұл бағыттағы зерттеулерді айтарлықтай жеделдетті. Өткен жылдан бастап бірқатар әзірлемелер зертханалық сынақ кезеңінен практикалық қолдануға өтіп, науқастарды емдеуде нақты нәтижелер көрсете бастады.

Ең елеулі жетістіктердің бірі — отандық «Бэйнао-1» және «Бэйнао-2» жүйелері. Мамандардың айтуынша, жартылай инвазивті «Бэйнао-1» жүйесі жеті пациентке имплантацияланған. Олардың барлығы оңалту кезеңінен сәтті өтіп, қозғалыс және сөйлеу функцияларын қалпына келтіре алған. Ал «Бэйнао-2» жақын уақытта клиникалық сынақ кезеңіне өтеді деп күтіліп отыр.

«Ми–компьютер» интерфейсі адамның миы мен сыртқы құрылғылар арасында тікелей байланыс орнатуға мүмкіндік береді. Ми сигналдарын оқып, оларды интерпретациялау арқылы мұндай жүйелер пациенттерге протездерді, компьютерлерді және басқа да көмекші технологияларды басқаруға жол ашады. Бұл әсіресе ауыр қозғалыс бұзылыстары бар адамдар үшін аса маңызды.

МКИ технологияларын дамыту мемлекеттік деңгейде белсенді қолдау тауып отыр. Ол «екі сессия» аясында басым бағыттардың қатарына енгізіліп, болашақтың саласы ретінде белгіленді. Сонымен қатар инфрақұрылым да кеңейіп келеді: Бейжің, Тяньцзинь, Гуанчжоу, Ухань және Нанкин қалаларында арнайы клиникалар мен зерттеу орталықтары ашылып жатыр.

Маңызды қадамдардың бірі — мойын омыртқасы жарақатынан туындаған тетраплегиясы бар науқастарға арналған МКИ негізіндегі әлемдегі алғашқы инвазивті медициналық құрылғының мақұлдануы. Бұл құрылғы қол мен саусақтардың функцияларын ішінара қалпына келтіруге мүмкіндік береді.

Мұндай технологиялардың өзектілігі мәселенің ауқымымен түсіндіріледі. Мамандардың дерегінше, Қытайда жұлын жарақатымен ауыратын науқастардың саны 3,7 миллионнан асады. Сонымен қатар МКИ Паркинсон ауруын, эпилепсияны, инсультті және бүйірлік амиотрофиялық склерозды емдеуде перспективалы шешім ретінде қарастырылып отыр.

Параллель түрде индустриялық экожүйе де дамып келеді. Бейжіңнің Хайдянь ауданында бұл салада жұмыс істейтін ондаған компания шоғырланған. Билік 2030 жылға қарай шамамен 100 инновациялық кәсіпорынды тартуды және МКИ технологияларын медицинада, білім беруде және өнеркәсіпте кеңінен қолдануды жоспарлап отыр.

Сонымен қатар сарапшылар бірқатар мәселелердің әлі де өзекті екенін атап өтеді. Атап айтқанда, технологиялардың сенімділігі, қауіпсіздігі және этика мәселелері басты назарда қалып отыр. Мамандардың пікірінше, одан әрі даму үшін тек технологиялық серпіліс қана емес, сонымен бірге кадр даярлау, стандарттау және тұрақты индустриялық базаны қалыптастыруды қамтитын толыққанды экожүйе қажет.

Жалпы алғанда, Қытай МКИ технологияларын неврологиялық ауруларды емдеу тәсілдерін өзгерте алатын және адам мен технология арасындағы өзара әрекеттестікті жаңа деңгейге шығаратын стратегиялық бағыт ретінде қарастырып отыр.

Еске сала кетсек, жуырда Қытай 2025 жылғы басты ғылыми жетістіктерін жариялады.