Қытайда автокөліктерді өзіндік құнынан төмен бағамен сатуға тыйым салынды

ҚХР Нарықты реттеу жөніндегі мемлекеттік басқармасы «Автомобиль саласындағы баға белгілеу ережелерін сақтау жөніндегі нұсқаулықты» жариялады. Құжатта автоконцерндердің бірқатар әрекеттері демпинг ретінде жіктеліп, мұндай тәсілдерді қолданған компаниялар елеулі құқықтық тәуекелдерге тап болатыны ескертілген.

Нұсқаулыққа сәйкес, автоконцерндерге жаңартылған модельдерді базалық нұсқалардың бағасымен сатуына, егер қорытынды баға өндіріс шығындарынан төмен болса, жеңілдік немесе субсидия ұсынуына, сондай-ақ бәсекелестерді ығыстыру немесе нарықта үстем жағдайға ие болу үшін демпингтік тетіктерді қолдануына тыйым салынады.

Аталған әдістер қытайлық автоконцерндер тарапынан бағаны тікелей төмендетудің баламасы ретінде пайдаланылып келген. Өткен жылы ел экономикасындағы дефляция жағдайында реттеушілер нарық қатысушыларын «баға соғысын» тоқтатуға бірнеше рет шақырған. Себебі бұл үрдіс көптеген өндірушілерді табыс табу мүмкіндігінен айырған.

Шанхайдағы Wan Zhuo Auto дилерлік орталығының сату жөніндегі директоры Чжао Чжэнь жаңа ережелер биыл автокөлікке деген сұранысты бәсеңдетуі мүмкін екенін айтты. Оның пікірінше, сату салығы бойынша жеңілдіктердің біртіндеп тоқтатылуы жеткізілім көлемінің азаюына әсер етеді.

Бұған дейін электромобиль сатып алушылар 10 пайыздық сатып алу салығынан толық босатылған еді. Енді олар 5 пайыз салық төлейді, өйткені Бейжің салықтық ынталандыру бағдарламасын кезең-кезеңімен тоқтатып жатыр. 2028 жылға қарай сатып алу салығының мөлшерлемесі стандартты 10 пайызға қайта оралады.

Еске салайық, Қытайдың 6 дөңгелекті көлігі Антарктикада 10 мың шақырымнан астам жол жүріп өтті.