Қытайда оқитын қазақ жастары көбейді

Қытайда білім қуған қазақстандық жастар көбейді. Бұған екі ел арасында қалыптасқан мәдени-гуманитарлық стратегиялық серіктестік тікелей әсер етті.

Бүгінде көрші елдің жоғары оқу орындарында мыңдаған студент білім алып жатыр. Басым көпшілігі қытай тілінен бастап бүгінгі еңбек нарығындағы ең жоғары сұранысқа ие мамандықтарды оқып жүр. 

Қытайда білім алып жүрген қазақ жастарының саны бес мыңнан асты. Олардың дені Бейжің, Гуанчжоу, Шанхай, Сиань, Ханчжоу сияқты ірі-ірі қалалардағы жоғары оқу орындарында оқып жүр. Қазақстандық студенттер қауымдастығы тұрақты жұмыс істейді. 

Шади Алдабергенов, Қытайдағы қазақстандық студенттер қауымдастығының төрағасы:

- Қауымдастық қазақстандық студенттерді байланыстыратын ұйымға айналған. Мұнда белсенді жастар бірлесіп жұмыс атқарамыз. Түрлі қоғамдық, патриоттық іс-шаралар ұйымдастырылады. Жаңадан оқуға түскен студенттерге қолдау көрсетеміз. Волонтерлық жұмыстарға араласамыз.

Жүргізілген талдауға сәйкес қазақстандық студенттер пандемияға дейін гуманитарлық мамандықтарға көп түскен. Ал қазіргі жастар генетика, биология, жасанды интеллект, электронды сауда, машина жасау сияқты техникалық

мамандықтарды көп таңдайды. 

Шахрат Нұрышев, ҚР Қытайдағы төтенше және өкілетті елшісі:

- Пандемияның алдында жалпы Қытайда 14 мыңнан астам қазақстандық студент болатын. Өкінішке қарай пандемия кезінде шекара жабылды. Сабақтар болмады. Онлайн режим болды. Былтыр бізде 4200 адам болған. Қазір енді біздің алдын ала дерек бойынша 5200 деп отырмыз. Нақты деректерді біз Қытай тарапынан күтіп отырмыз. 

Бүгінде қос елдің жоғары оқу орындары арасында тығыз байланыс орнаған. Өзара бірлескен жобалар көбейді. Осының арқасында Қытайда білім алу мүмкіндігі артты. Сондай-ақ студент алмасу тәжірибесі де жүйелі жұмыс істеп тұр. 

Си Вэйнин, Бейжің шет тілдер университеті жанындағы қазақстанды зерттеу орталығының жетекшісі:

- Студенттер оқыды. Енді олар Қытайдың әрбір органдарында маңызды жұмыс істеп жатыр. Олардың жұмыстары көбінесе Қазақстанмен байланысты. Сондықтан Қазақстан мен Қытай арасындағы достық үшін өздерінің үлесін қосып жатыр. 

Бүгінде Қазақстан мен Қытай арасында мәдени-гуманитарлық ынтымақтастық нығая түсті. Мәдениет, ғылым, әсіресе білім саласы қарқынды дамуда. Бұған екі ел арасында қалыптасқан әріптестік әсер етіп отыр. Кейінгі кездері Қытайдың білім нарығы қазақстандық студенттердің негізгі бағытына айналып келеді. 

Авторлары: Руслан Бақытбекұлы, Мадияр Ерсайын