“Қызметтік бабымды пайдалануға ниетім жоқ“ әкім ұлының қатысуымен болған жол көлік оқиғасына қатысты

Арыс әкімі Қайсар Манқараев ұлының жол апатын жасағанын растады. Салдарынан 20 жастағы студент жарақат алып, екі аяғынан айырылды, деп хабарлайды тілші Tengrinews.kz.

Не болды

Жол апаты 29 мамыр күні кешкісін Астана – Павлодар тасжолында болды. 22 жастағы такси жүргізушісі тізгіндеген Hyundai Tucson темір қоршауға соғылған. Темір балка көлікті тесіп өтіп, алдыңғы жолаушылар отыратын орындық жағынан салонға кіріп кеткен. Оқиға орнынан түсірілген видео бұған дейін әлеуметтік желілерде тарады.

Үш адам зардап шекті. Ең ауыр жарақатты 20 жастағы студент Талғат Емел алды.

Сол күні ол Астанадан Павлодарға ата-анасына бара жатқан. Апат кезінде жас жігіттің бір аяғы жұлынып кетіп, екіншісі жаншылған, ауруханада дәрігерлерге оны да ампутациялауға тура келген.

Талғат Емел, фотоны туыстары ұсынған

"Дәрігерлер оның өмірін сақтап қалу үшін қолдан келгеннің бәрін жасады, бірақ аяғын сақтап қалу мүмкін болмады. Шұғыл ота кезінде екі аяғын да шап аймағына дейін кесуге мәжбүр болды. Ағамның айтуынша, соққыдан кейін есін жиғанда майдың иісін сезіп, көліктің өртенуі мүмкін екенін түсінген. Ол өздігінен көліктен шығуға күш тапқан. Оның сөзінше, сол сәтте жүргізуші оған көмектеспеген. Ол есеңгіреп қалғандай болып, шетте тұрған", - деді зардап шеккен студенттің әпкесі Гүлсім Абайілдинова Tengrinews.kz тілшісіне.

Олардың айтуынша, Талғат Емел клиникалық өлімді бастан кешіріп, көп қан жоғалтқан, бір айға жуық жансақтау бөлімінде жатқан, көптеген ота жасалған және әлі күнге дейін өмір үшін күресіп жатыр.

Кроссовер жүргізушісі ұсталып, оған қатысты сотқа дейінгі тергеп-тексеру басталды. Павлодар облысының Полиция департаментінің ақпаратынша, сотқа дейінгі тергеу Қылмыстық кодекстің 345-бабы 2-бөлігі "Көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзуы, абайсызда адамның денсаулығына ауыр зиян келтіруге әкеп соғуы" бойынша жүргізіліп жатыр. Сот санкциясымен жас жігіт үйқамаққа алынды.

Зардап шеккен студенттің туыстары істі тергеу объективті болмауы мүмкін деп қауіптенеді. Олардың айтуынша, күдіктінің әкесі – Арыс қаласының қазіргі әкімі, бұл жағдай тергеу мен сот талқылауының барысына әсер етуі мүмкін деп есептейді.

"Біз Қайсар Манқараевтың (Арыс қаласының әкімі - ред. ескертуі) лауазымдық жағдайы ұлы жасаған жол апатын тергеу барысына әсер етті деп айтпаймыз. Дегенмен, дәл осындай істер ерекше қоғамдық бақылауда болуы тиіс деп санаймыз", - деді Гүлсім Абайілдинова.

Сондай-ақ ол жол апатына күдіктінің бұған дейін ЖҚЕ бұзғаны үшін бірнеше рет жауапқа тартылғанын айтты.

"Тек кейінгі бір жыл ішінде бұл жүргізуші 29 рет әкімшілік жауапкершілікке тартылған. Адамның есебінде ондаған жол ережесін бұзу дерегі болса, бұл кездейсоқтық емес, қауіпті заңдылық. Егер жүйелі бұзушылықтарға уақтылы және қатаң реакция болғанда, бұл қасіреттің алдын алуға болар еді", - дейді зардап шеккен жігіттің әпкесі.

Зардап шеккеннің әпкесі екі отбасының кездесулері әзірге шығынды толық өтеу туралы талқылауға әкелмегенін айтады.

"Олар көптеген туысын ертіп келеді. Нақты көмекті талқылаудың орнына біз "жүргізушінің орнында кез келген адам болуы мүмкін еді" деген сөздерді естиміз. (...) Біздің Талғат бұдан былай ешқашан бұл қасіретке дейінгі өмірін сүре алмайды. Біз тек бір нәрсені сұраймыз: заң күдіктінің туыстарының лауазымына, байланыстарына, тегі мен мәртебесіне қарамастан бәріне ортақ болсын", - деп толықтырды зардап шеккеннің әпкесі.

Tengrinews.kz тілшісіне күдікті такси жүргізушісінің әкесі – Арыс әкімі Қайсар Манқараевпен байланысудың сәті түсті. Ол жол апатын жасаған кроссовер рөлінде ұлы болғанын растады.

"Көлік тізгінінде ұлым болғанын растаймын. Ол кәмелетке толған азамат және өз іс-әрекеті үшін заңға сәйкес жеке жауап береді. Мен үшін және отбасым үшін бұл жағдай ауыр сынақ болды. Ең алдымен, ауыр жарақат алған жас жігітке, сондай-ақ оның туған-туыстары мен жақындарына шын жүректен жанашырлығымды білдіремін. Оған күш-қуат, тезірек сауығып кетуін тілеймін", - деді Қайсар Манқараев.

Ол болған оқиғаға байланысты өз өкілеттігін пайдалануы мүмкін деген болжамдармен келіспеді.

"Тергеу барысына немесе іс бойынша қабылданатын процесуалдық шешімдерге әсер етуге ешқандай әрекет жасамағанымды және жасамайтынымды жауапкершілікпен мәлімдеймін. Тергеуді уәкілетті мемлекеттік органдар тек заңнама талаптарына сәйкес жүргізуі тиіс және жүргізеді де. Заң бәріне ортақ. Бұл қағида менің отбасыма да бірдей дәрежеде қолданылады", - деді Арыс әкімі Қайсар Манқараев.

Зардап шеккен Талғат Емелдің туыстары Бас прокуратура мен Ішкі істер министрлігінен істі тергеуді бақылауға алуды сұрайды.

Google News арқылы жаңалықтарымызды қадағалаңыз