​ Қызыл сызықтан өтті : Қазақстанда Украинаның КҚК ға жасаған соққыларына баға берілді

Каспий құбыр консорциумы (КҚК) нысандарына жасалған шабуылдар халықаралық компаниялардың қатысуы да соққыларды тоқтата алмайтынын көрсетті. Бұл туралы RT арнасына берген сұхбатында мұнай-газ сарапшысы, энергетика министрінің бұрынғы кеңесшісі Олжас Байділдинов мәлімдеді.

Сарапшының айтуынша, 2025 жылғы қарашадағы алғашқы шабуылдан бері Қазақстанның шығыны мен жіберілген пайдасы 2 млрд доллардан асқан.

Ресей қорғаныс министрлігі 6 сәуірге қараған түні украиналық дрондар Новороссийскідегі теңіз терминалына, соның ішінде КҚК инфрақұрылымына соққы жасағанын хабарлады. Мәскеу бұл әрекетті консорциумның ірі акционерлеріне, оның ішінде АҚШ пен Қазақстан компанияларына экономикалық зиян келтіру мақсатымен байланыстырды.

Ал Reuters агенттігі украиналық әскерилердің мәлімдемесін жариялап, олардың дрондары Шесхарис аймағындағы мұнай құю инфрақұрылымын (КҚК терминалынан 15 км қашықтықта) нысанаға алғанын жеткізді. Украина қауіпсіздік қызметінің өкілі алты мұнай танкерін құю алаңы зақымданғанын, құбыр жүйесінің торабы мен мұнай есептеу торабына да зиян келгенін айтты.

Шабуыл салдарынан ірі өрт шыққан.

Қазақстан Энергетика министрлігі бұл оқиға мұнай экспортына әсер етпегенін мәлімдеді. Ведомство өкілі Әсел Серікпаева шикізатты қабылдау және тасымалдау магистральдық құбыр жүйесі арқылы қалыпты режимде жүріп жатқанын айтты. Экспорттық жоспарлар график бойынша орындалуда, ал қазақстандық мұнай жеткізілімінде ешқандай іркіліс тіркелмеген.

Бүгін, 13:21