Қызылорда облыстық садақ ату федерациясының басшысы тағайындалды

Қаланың сол жағалауындағы «Қайсар» стадионында облыстық садақ ату федерациясының жаңа басшысын сайлауға арналған арнайы жиын өтті.

Оған ҚР Ұлттық садақ ату федерациясының президенті Азамат Өсімбеков, облыстық дене шынықтыру, спорт және туризм басқармасының басшысы Бахтияр Артаев, сондай-ақ жергілікті бұқаралық ақпарат құралдарының өкілдері қатысты.

Жиын барысында ҚР Ұлттық федерациясының өкілдері облыстық Садақ ату федерациясының жаңа басшысы ретінде белгілі кәсіпкер Исламғали Айтуарұлы Қозбақовты таныстырды.

Қатысушылар тарапынан жаңа кандидатура қолдау тауып, нәтижесінде аталмыш федерацияға жаңа басшы сайланды.

Айта кетейік, Мемлекет басшысының тапсырмасына сәйкес, кәсіпкер Исламғали Айтуарұлы қазіргі таңда жергілікті «Қайсар» футбол клубын басқарып отыр. Ендігі кезекте ол өңірде олимпиадалық спорт түрлеріне енгізілген садақ ату спортын жетілдіруге және оның кәсіби сипатын арттыруға күш салмақ.

Сонымен қатар, 11 мың орындық жаңа стадион «Kaysar Arenада» садақ ату үйірмесі ашылып, өз жұмысын бастады. 

Еске салсақ, бұдан бұрын Қызылорда облыстық грек-рим, еркін және әйелдер күресі федерациясының президенті тағайындалды.