Қызылорда облысында 10 мектепте Су клубтары ашылды

Жаңа жоба жайлы Jibek Joly телеарнасының «Бүгін.Live» бағдарламасында ҚР Су ресурстары және ирригация министрлігі ақпараттық-талдау орталығының жоба жетекшісі Ермахан Полат мәлімдеді.

— Жобаның мақсаты — жастар арасында су ресурстарын ұқыпты пайдалану және суды үнемдеу мәдениетін қалыптастыру. Өңірдегі 10 мектепте бағдарлама өз жұмысын бастады. Сонымен қатар 45 магниттік мектеп те жобаға қатысады. Бұл білім ордаларында арнайы «Су клубтары» құрылды. Клуб құрамына жоғары сынып оқушылары біріктірілген. Олар бастауыш сынып оқушыларына су үнемдеудің маңызы туралы түсіндіріп, экологиялық жауапкершілікке баулиды, — дейді маман.

Спикер сөзінше, жоба аясында Оқу-ағарту министрлігімен бірлесе «Адал азамат — біртұтастық» бағдарламасы негізінде іс-шаралар жоспары әзірленген. Әр шара балалардың экологиялық мәдениетін қалыптастыруға бағытталған.

— Оқушылар арасында сурет байқаулары, плогинг акциялары, дебаттар ұйымдастырылады. Сондай-ақ «Тамшының шытырман оқиғалары» атты ертегілер мен эко-сағаттар өткізіледі. Ұстаздардың қатысуымен онлайн-конференциялар да ұйымдастырылады. Бұл шаралар арқылы оқушылар суды үнемдеуге өз үлесін қосуға мүмкіндік алады. Барлық ақпарат пен жаңалықтар Tamshy.kz сайтында жарияланады. Сонымен қатар оқушылар арасындағы байқаулар да осы платформа арқылы өткізіледі, — дейді ол.

Осы тұста Ермахан Полат пилоттық жоба үшін Қызылорда облысы кездейсоқ таңдалмағанын да атап өтті.

— Жобаны қаржыландырып отырған Француз даму агенттігі Қазақстанда жерінде талдау жүргізген. Нәтижесінде су мәселесі өзекті аймақтарды анықтап, Қызылорда өңірін таңдаған. Бастама Қазақстан мен Өзбекстан оқушыларын Арал теңізі бассейніндегі су ресурстарына ұқыпты қарау мәдениетіне тәрбиелеуді көздейді. Екі елде де қатар жүзеге асырылып жатыр. Арнайы зерттеу жұмыстары барысында өңірдегі су тапшылығы мен оны тиімді пайдалану мәселесі нақты айқындалған, — дейді Ермахан Полат.

Маманың айтуынша, жыл соңына дейін жобаны өзге өңірлерде кеңейту жоспарланып отыр. Атап айтқанда, Қостанай, Қарағанды және оңтүстік облыстарда іске асыру көзделген. Осылайша бастама кезең-кезеңімен республика көлемінде таратылады.

Еске сала кетейік, Сенатта жерасты су ресурстарын тиімді пайдалану мәселесі көтерілді.