Қызылордада айына бес мың тоннаға жуық қоқыс полигонға төгіледі

Қызылордада күн сайын 60 арнайы техника мен 300-ге жуық жұмысшы қаланы тазалауға шығады.  

Айына 5 мың тоннаға жуық қоқыс полигонға төгіледі.  Десе де, барлық жерді тап-тұйнақтай ұстау мүмкін болмай тұр.

Шанхай шағын ауданындағы Әлқуат Қайнарбаев атындағы көшенің маңында   қоқыс үйіліп қалған. Тұрмыстық қалдықты осы сайға әкеліп, аудара салатындар көп. Сол айналаның тұрғындары қараусыз жерді кәдеге жарату керек деген ой айтты. Жергілікті билік сайды тазалап, балаларға ойын алаңын салса дейді.

Шәріпбек Ерманов, қала тұрғыны:

- Мусорды бір мусор алып жатқан жоқ. Алып жатыр екен, мына жерге қойсын да, мусорды соған тастасын, үйренсін соған. Сол кезде мына жер таза болып тұрады. Ана жерді көмсін, ештеңе соқпаса да балалар ойнайтын, мына жерде кішкентай балалар көп, балалар ойнайтын алаң жасап тастамай ма, одан да.

«Ақмешіт» шағын ауданындағы номері 2-үйдің айналасы да шашылып жатыр. Көбіне балалар қоқысты контейнерге жеткізбей, кез келген жерге тастай салады екен. Осы орайда өскелең ұрпақты тазалыққа баулып, мәдениетін көтеру керек, дейді қариялар. 

Айна Орынбасарова , қала тұрғыны:

- 4-5 оқитын балаларға беріп жібереді, әне жерге апарып тастайды. Бірақ бұл жердің адамдары заңды жинайды, сыпырып. Жан-жағының бәрін жақсылайды. Халық деген түсінбейді, осындай қылып тастайды. Ал мен үлкен кісімін, 75 жастамын. Ана жақтан әкеліп кәдімгідей саламын.

Қала тазалығына жауаптылар өз міндетімізді атқарып отырмыз дейді.  Айтуларынша, қоқыс жәшігі де, коммуналдық техника да жеткілікті. Күн сайын қаланы тазалауға 60-қа жуық техника мен 270 адам жұмылдырылады.  Дегенмен, осы жиналған   қоқысты қайта өңдеу мәселесі әлі де өзекті. Қаладан шығатын тұрмыстық қалдықтың небәрі 30 проценттен астамы өңдеуден өтеді.

Ерлан Оңласынов,  "Қызылорда тазалығы" КМК директорының орынбасары:

- Қазіргі таңда бүкіл жеке тұрғын үйлердің графиккке қойып қойғанбыз, әр күнге. Сол бойынша сағат азанғы 6-дан 8-ге дейін тұрғындар шығарып қояды.Сол графикке сәйкес кешіктірілмей, сағат 8-де басталса, 9-10-ға дейін бүкіл көшелердің мусорлары алынады. Болады енді арасында графикке сәйкес шығарылмаған кездері, ол кезде мобильді топтар құрылған. Солармен күнделікті рейд жұмыстары жүргізіліп, штраф салынуда. 

БЛИЦ

- Апайларымыз, апаларымыз жұмыс істеп, қыс-жазға қарамай ыстық-суық болса да осы тазалап жүргеніне өзім көзім жеткілікті, көріп жүрмін.

- Өзімізге де байланысты ғой, қаланы таза ұстаудың өзі өзімізге байланысты. Кейбір жерлерде қарасаңыздар, скамейкаларды сындырып кеткендер бар, мусор тастайтындар бар. Оның бәрі өзіміздің мәдениеттілігімізді төмендетіп көрсетеді. 

Қаланың тазалығына тұрғындар да үлес қосса, жұмысымыз едәуір жеңілдер еді- дейді жауаптылар. Бұл орайда, ақпараттық технологияның мүмкіндігін пайдалануға болады. Мысалы ,TazaQazBot чаты іске қосылғалы, қала тұрғындарынан 700-ге жуық өтініш түскен. Бірақ коммуналдық мекеменің кері байланысы қаншалықты жедел? Әлқуат Қайнарбаев атындағы көшеде  үйілген қоқысқа қатысты біз де өтініш жолдап көрдік.  Арызымыз қабылданып, жауапты қызметкердің аты-жөні көрсетілді.

Бердібек Шөкенов, қалалық ТҮКШ, жолаушылар көлігі және автомобиль жолдары бөлімі басшысының орынбасары:

- Шұғыл түрде жауап беруге тырысамыз. Егер шешімін табуды қажет ететін мәселелер болса, сол мезетте орындап, егер қаржыны талап ететін болса, оған тұрғынмен сөйлесіп, түсіндірме жұмыстары жасалып, жоспарға енгізіліп отырады.

Десек , адамдарды тазалыққа шақырып, ортақ іске жұмылдыру мақсатында ашылған  TazaQazBot жобасы  туралы біраз тұрғын білмейтін болып шықты.  

БЛИЦ

- Телеграм- бот тазалыққа байланысты естігенім жоқ ондай.

- Телеграм-ботқа қызықпайды екенмін. 

- Естуім бар, бірақ мен оны пайдалана алмаймын. 

Бұдан түйген ойымыз көпшілік бұл жүйемен таныс емес, білген жағдайда да қолдану әдісінен бейхабар. Сондықтан ақпараттық-түсіндіру шараларын күшейту керек, дейді тұрғындар. Айта кетейік, былтыр еліміз бойынша чат-ботқа 25 мың өтініш түссе, 23 мыңнан астамы шешімін тапқан.

Нұрлан Жақыпбеков, Ақан Әлиев, Нұржан Мұзарапшин