Қызым бір құпияны біліп қойған : Германияда қаза тапқан судьяның анасы жан айқайын жеткізді

2024 жылғы 3 маусымда хабарсыз кеткен Айгүл Сайлыбаева 16 маусым күні Германияда пластикалық қапшыққа салынған күйі өлі табылған еді. Марқұмның денесінен пышақтың көптеген ізі анықталған. Тергеу барысында экс-судьяның өліміне негізгі күдікті ретінде енесі Наталья Данцова танылып, күйеуіне қылмысты жасыру дерегі бойынша іс қозғалды. Алайда осы уақытқа дейін күдіктілер қамауға алынбаған. Кейін анасы мен ұлының Мәскеуде тұрып, жұмыс істеп жүргені белгілі болды. Қайғыдан қан жұтқан марқұмның анасы Шолпан Батқалова қызының өліміне қатысты тың әрі жантүршігерлік деректерді жария етті. Бұл туралы Stan.kz ақпарат агенттігі хабарлады.

Айгүл Сайлыбаева – «Болашақ» бағдарламасының түлегі, жоғары білім алып, елдегі құқық саласында қызмет атқарған маман. Шетелде оқып жүрген кезінде ол Талдықорған қаласының тумасы Александр Данцовпен танысады. Александр Айгүлге үйленуге ұсыныс жасағанымен, оның ата-анасы бастапқыда бұл некеге қарсы болған.

Марқұмның анасы қызының мінезі жайлы былай дейді:
«Айгүл жастайынан білімге құштар, сабырлы, ешкімге салмақ салмайтын, өз мәселесін өзі шешуге тырысатын қыз еді. Сот саласында бірнеше жыл жұмыс істеген соң, шетелге оқуға түсті. Біз оған тұрмыс құру жайын айтқанымызбен, ол алдымен білімімді аяқтаймын дейтін. 2016 жылы шетелде кітапханада Александрмен танысып, кейін тұрмысқа шығатынын айтты. Алғашында қарсы болдық. Бірақ 2019 жылы сол шешімін қайта айтқанда, қызы­мыздың бақыты үшін келісім бердік. Қазір сол келісімге қатты өкінемін».

Үйленгеннен кейін Айгүл мен Александр Германияға қоныс аударған. Көп ұзамай күйеуінің анасы Наталья Данцова да олардың қасына барған. Анасының айтуынша, қызы тұрмысқа шыққан соң күйеуі мен енесі тарапынан қысым көрген. Алайда бұл туралы ата-анасына айтпай, тек жақын құрбыларына ғана шағымданған.

«Қызымды аса қатыгездікпен өлтірген. Денесін көл маңынан пластикалық қапшыққа салып тастаған. Сараптама оның денесінде 30-дан астам пышақ жарақаты болғанын көрсетті. Тергеу дерегінше, қылмыскерлер денені бөлшектеуге тырысқан, мойнынан бауыздалған, бет-әлпеті қатты зақымданған. Қазіргі таңда Германияда адам өлтіру дерегі бойынша тек енесі Наталья Данцоваға қатысты іс қозғалды, себебі оқиға орнынан оның қаны табылған. Сондай-ақ Айгүл жоғалған күні Наталья Германиядан кетіп қалған. Ал күйеуі Александр Данцовтың интернеттен “адам өлтіру” және “қылмысты жасыру” туралы заңдарды іздегені анықталды. Осыған қарап, олар қылмысты алдын ала жоспарлаған болуы мүмкін деп күдіктенемін», – дейді Шолпан Батқалова.