Радиоактивті материалдарды қауіпсіз тасымалдау құжаты қабылданды

Сенат радиоактивті материалдарды қауіпсіз тасымалдау құжатын қабылдады, деп хабарлайды 24KZ. Бұл бір жағынан бейбіт атом энергетикасының дамуына да септігін тигізеді. Келісім ТМД-ға мүше мемлекеттер арасында бекітілген. Яғни құрлық, су және әуе арқылы трансшекаралық жеткізуді қамтиды.

ТМД аумағында радиоактивті материалдар тасымалданады. Алайда алаңсыз болу үшін тараптарға қатаң талап қажет. Сондықтан Сенат қауіпсіздікті күшейтетін және оны бақылау бағыттары пысықталған құжатты қабылдады.

Әлібек Нәутиев, ҚР Парламенті Сенатының депутаты:

- Келісім ТМД-ға қатысушы мемлекеттердің ұлттық рәсімдерін МАГАТЭ-нің халықаралық қауіпсіздік нормаларымен үйлестіруге бағытталған құқықтық негіз қалыптастырып, сол арқылы радиоактивті материалдарды қауіпсіз және тиімді трансшекаралық тасымалдау үшін құқықтық өрісті қамтамасыз етеді.

Дерекке жүгінсек, радиоактивті материалдардар тасымалында тек ТМД-мен тарылып қалмайды екенбіз. Ел арқылы Өзбекстаннан өтіп, Қытай асады. Одан әрі жол шалғай. Канада, АҚШ, Румыния, Ресей, Аргентина, Үндістан және Украина деп кете береді. Ең көбі 3 жыл бұрын 21 транзиттік жүк жөнелтілген. Былтыр үшеу, биыл 10-ға жетіпті. Бізден шығып, қайда барса да, бастысы айналаны ластамай, адамға зауалы тимеуі тиіс.

Уран да – радиоактивті элемент. Әлемге мәлім, оны өндіруде көш басындамыз. Бірақ сарқылмайтын дүние бар ма? Оның үстіне елде 3 атом электр станциясы салынбақ. Отыннан тапшылық болмай ма?

Ғұмар Серғазин, ҚР Атом энергиясы жөніндегі агенттік төрағасының орынбасары:

- Ұлттық атом станцияларымызды қамтуға толық жетеді. Біздегі қазір уранның қоры 60 жылдан асады. Табиғи уран қоры 1 млн тоннаға жуық. Сондай-ақ әлі барланбаған кен орындары бар.

Сондай-ақ Ғұмар Серғазин Финляндиямен арадағы келіссөзді атады. Ондағы 2 атом станциясына біздің уранды жеткізу жағы келісіліп жатыр.

Авторлары: Нысаналы Ығыл, Өрден Жарқын