Рафаэль Уразбахтин: Левскиді құрметтейміз, бірақ ешкімнен қорықпаймыз

Уразбахтиннің айтуынша, «Левски» – өте мықты қарсылас, сондықтан алматылық клуб бұл кездесуге жан-жақты дайындалған.

«Бізді өте маңызды матч күтіп тұр. Қарсыластың ойынын егжей-тегжейлі зерттедік. Бұған жеткілікті уақыт болды», деді ол.

Бапкердің пікірінше, өткен маусымда Болгария чемпионы атанған «Левскидің» табысы кездейсоқ емес. Ол әсіресе команданың шабуыл шебінің жылдамдығы мен қарқынын ерекше атап өтті.

«Біз олардың қалай ойнайтынын, қай футболшылар арқылы шабуыл құратынын білеміз. Қарсыласты құрметтейміз, бірақ ешкімнен қорықпаймыз», деді Р. Уразбахтин.

Сонымен қатар ол Софиядағы жанкүйерлердің қызу қолдауына да тоқталды. Оның айтуынша, «Қайрат» футболшылары бұған дейін де 50–60 мың көрермен жиналған стадиондарда ойнағандықтан, мұндай атмосфера олар үшін тосын емес.

Чемпиондар лигасы: «Қайраттың» келесі қарсыласы анықталды

Бапкер қазақ және болгар футболын байланыстыратын тарихи тұлғаларды да еске алды. Атап айтқанда, кезінде «Левски» мен «Астананы» Чемпиондар лигасының топтық кезеңіне шығарған Станимир Стоиловтың еңбегін жоғары бағалады.

Сондай-ақ ол «Қайраттың» қарымта матчы Алматыда емес, Түркістанда өтетініне қатысты пікір білдіріп, команда бұл жағдайды қабылдап, екі ойынға да тыңғылықты дайындалып жатқанын жеткізді.

Бапкер клубтың трансферлік жұмыстары жалғасып жатқанын да айтты. Оның сөзінше, команда құрамында әлі бір легионерге арналған бос орын бар және қазіргі таңда қажетті футболшыны іздеу жүріп жатыр.

«Қайрат» өз алаңында «Ордабасыны» жеңіп, Премьер-лигада көш бастады

Ол жас ойыншы Исмаил Бекболаттың соңғы ойындардағы өнеріне де оң баға берді. Оның айтуынша, Чемпиондар лигасындағы кездесулер жас футболшының тәжірибе жинақтап, кәсіби тұрғыдан өсуіне үлкен мүмкіндік береді.

Еске салайық, бұған дейін  Рафаэль Уразбахтиннің Дастан Сәтпаевтың «Челсидің» негізгі құрамына өту мүмкіндігі туралы айтқан пікірін жариялаған едік.

Сондай-ақ «Қайрат» және «Левски» ойынын қайдан көруге болатыны хабарланды.