Рафаэль Уразбахтин Қайрат командасының Лондондағы ойынын бағалады

Матчтан кейінгі баспасөз мәслихатында алматылық құраманың жаттықтырушысы Рафаэль Уразбахтин жинақталған тәжірибенің маңыздылығын және команданың еуропалық додада жүріп өткен жолын атап өтті.

— Біздің футбол ертегіміз аяқталды. Жинаған баға жетпес тәжірибеге өте қуаныштымыз. Біз үздік командалармен ойнап, топ-клубтарды Қазақстанға әкелдік, — деді Уразбахтин.

Оның айтуынша, алматылық клубтың ойыны жанкүйерлердің футболға деген қызығушылығын айтарлықтай арттырды, команданың чемпиондар лигасына қатысуы, оның ойынша, белгілі бір дәрежеде қазақстандық футболдың қарқынды дамуына серпін берді.

Бас бапкер «Арсеналға» қарсы матч туралы айта келіп, қарсыластың жоғары деңгейі мен ойыншыларының жанкештілігін ерекше атап өтті.

— Біз үздік команданың бірімен ойнадық, бұл біз үшін баға жетпес тәжірибе болды. Жігіттер жақсы өнер көрсетті, олар барын салғаны үшін алғыс. Алғашқы минуттарда біраз абдырап қалдық. Мүмкін толқыған шығар. Қарсыластың ойынын қапталға бағыттап, орталықты жауып, тік пастарға жол бермеуге келістік. Алайда үшінші минутта қателік жасап, гол жіберіп алдық, — деді алматылық команданың бас бапкері.

Қарымта шабуылда белгіленген пенальти «Қайраттың» ойынға қайта оралуына мүмкіндік бергенін айтып, бұл гол болмаса команда психологиялық тұрғыдан әлдеқайда қиын кезеңге тап болатынын атап өтті.

Бапкер сондай-ақ жанкүйерлерге қолдау көрсеткені үшін алғысын білдіріп, 60 мың орындық Эмиратс стадионында команда өз жанкүйерлерін анық естігенін айтты.

Сөз соңында Уразбахтин команданың Лондондағы күрделі сынақтан абыроймен өткенін атап өтті.

— Біз үшін бұл сынақтан — топ-клубқа қарсы матчтан өту маңызды болды. Мен жігіттер алаңда барын салады деп айттым, біз дәл солай істедік деп ойлаймын. Біз бұл матчты абыроймен өткіздік, — деп түйіндеді алматылық команданың бас бапкері.

Бұған дейін «Қайрат» командасы «Арсеналға» 2:3 есебімен есе жібергені туралы жаздық.