Рамазан Айнегов Азия ойындарының жүлдегері атанды

Қазақстандық Рамазан Айнегов 23 қазанда Бахрейннің Манама қаласында өтіп жатқан 2025 жылғы жасөспірімдер арасындағы Азия ойындарында күміс жүлдеге ие болды. Ол триатлоннан екінші нәтиже көрсетті. Olympic.kz сайтына берген сұхбатында спортшы өз өнері мен жарыс деңгейіне баға берді, – деп хабарлайды Aikyn.kz.  

"Жарыс өте тартысты өтті. Жалпы, өз нәтижеме көңілім толады. Бұл - суперспринт, қашықтық қысқа, сондықтан бәрі мәре сызығында шешіледі. Суда жүзуде алғашқы ондықтың қатарында болдым. Велокезеңде жылдамдықты арттырып, ал жүгіру кезінде екінші орынға шықтым. Егер бәрі мінсіз болғанда, бәлкім, жеңіс үшін де таласып көруге болар еді. Бірақ бар мүмкіндігімді толық пайдаландым. Жүгіруде бар күшімді салдым, сондықтан күміс медаль алғаныма өте қуаныштымын.

Бәсекелестік деңгейі жоғары болды. Қытай мен Жапониядан бұрын көрмеген жаңа спортшылар келіпті. Олармен бәсекелесу өте қызықты. Қатысушылардың дайындығы расымен жоғары деңгейде, сондықтан күрес шиеленісті өтті.

Мұндағы климат та өз әсерін тигізеді. Ауа ыстық әрі ылғалды. Қазақстанмен салыстырғанда айырмашылық қатты сезіледі. Тыныс алу қиын, әсіресе жүзуден кейін бірден велокезеңге шығу керек кезде жүрек соғысы жиілеп, ауа жетпей қалады.

Суперспринт форматының өз қиындығы бар: бәрі көзді ашып-жұмғанша өтеді. Қарқын тым жоғары, демалуға уақыт болмайды. Егер әдеттегі спринт болғанда, сәл жеңілдеу болар еді. Онда өз ырғағыңды тауып, біртіндеп қарқын қосуға мүмкіндік бар. Маған екі шақырым жүгіргеннен кейін екпін алған ыңғайлы, бірақ мұнда жол қысқа. Сондықтан енді тынысыңды ашып келе жатқанда, мәре де жақындап қалады.

Велокезеңде бір жапон спортшысы топ ішінде құлап қалды. Абырой болғанда, мен аман қалдым. Ол бізден сәл ғана қалып келе жатқан. Осылайша жарысты жалғастырдым.

Жалпы, бәрі жоспар бойынша өтті. Дайындығым медаль үшін күресуге жеткілікті болды. Жүзу менің ең мықты тұсым емес, бірақ бар күшімді салып, велокезеңдегі негізгі топқа қосыла алдым. Ал жүгіруде көшбасшылар қатарына ендім.

Ендігі жоспар - эстафета. Екі күннен кейін аралас командалық (екі ұл және екі қыз) жарыс өтеді. Мүмкін, мен де қатысармын. Тағы да барымды салып, ел намысын қорғағым келеді.

Азия ойындарынан кейін, ең алдымен, демалыс күтіп тұр. Желтоқсанда Сауд Арабиясында өтетін 17 жасқа дейінгі Азия чемпионатына қатысуым мүмкін, бірақ әзірге нақты емес. Қазір басты мақсат - қалыпқа келу," - деді Айнегов.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.