Павлодар дзюдошысы Сурдлимпиада ойындарының күміс жүлдегері атанды

Токиода өткен Сурдлимпиада ойындарында павлодарлық дзюдошы командалық жарыста күміс медальға ие болды, деп хабарлайды 24KZ. Қазақстандық спортшылар Алжир және Корея командаларын жеңіп, финалда Украина құрамасына есе жіберді.

43 жасар Ольга Гараева дзюдоға 8 жыл бұрын келді. Мүгедектігі бар спортшы халықаралық дәрежедегі спорт шебері, әлем чемпионаты мен Азия-Тынық мұхиты ойындарының жүлдегері атанған. Токио Сурдлимпиадасында Қазақстан Республикасының еңбек сіңірген спорт шебері нормативін орындап, жаңа биік белесті бағындырды.

Ольга Гараева, Сурдлимпиада ойындарының күміс жүлдегері:

- Мен дзюдоға келген кезде спортшылардың жарыстарға қатысып, жүлделі орындар алып жүргенін көріп қызығатынмын. Олимпиадаға қатысуға ұсыныс түскенде одан бас тарта алмадым. Барлық шаруамды ысырып қойып, жаттығуға кірісіп кеттім. Осы қиын жолды еңсеріп, еліміздің қоржынына күміс медаль салағанымды мақтан етемін.

Бұл облыс үшін сурдлимпиадалық спортта алынған алғашқы жоғары дәрежелі жүлде. Ольганың жаттықтырушысы Денис Амелиннің айтуынша, спортшылар үшін ғана емес бүкіл өңір үшін маңызды.

Денис Амелин, жаттықтырушы:

- Ольга жас спортшы емес. Екі баласы мен жолдасы бар. Соған қарамастан жаттығулардан қалмайды. Өз ісіне жауапкершілікпен қарайды. Бұл кез келген жаттықтырушы үшін ерекше бағалы қасиет. Ол арманына жету үшін бар күш-жігерін жұмсады. Мен де өз тарапымнан оның жанынан табылып, үнемі қолдау көрсетуге тырыстым.

Қазір Ольга демалыста. Аздаған үзілістен кейін жаттығуларын қайта бастайды. Алда жаңа жарыстар күтіп тұр. Дзюдошы болашақта өтетін байрақты бәсекелерде алтын жүлдеге таласпақ.

Авторлары: Қарлығаш Қасиетова, Дәулет Қошқарбаев, Марат Игіліков