Референдум: Дауыс беріп жатқан халықтың қарасы көп

Орталық референдум комиссияның мәліметінше, 2 393 844 азаматы бюллетень алды. Ол тізімге енгізілген азаматтардың 19,21 пайызға жетті, – деп хабарлайды Aikyn.kz.

Бұл жалпы сағат 10.00-дегі жағдай бойынша берілген мәлімет.

Негізі елімізде 12 461 796 дауыс беруші тіркелген. Заң бойынша, осы саннан 1% артық бюллетень әзірленеді. Демек, 12 586 414 бюллетень болмақ. Алайда жыртып не бүлдіріп алса, азаматтарға жаңа бюллетень берілмейді.

Егер азамат ешқайда тіркелмеген болса, мұның да шешімі қарастырылған. Ел бойынша 220 учаскеге 1 тәулікке тіркелуге болады. Мұндай жағдайда азамат тізімге енгізіліп, дауыс беру үшін оған бюллетень ұсынылады.

 Естеріңізге сала кетейік, қазір референдумға қатысушылардың арасында көшті бастап тұрған  – Қарағанды облысы 

Референдум кезінде Қазақстанда ғана емес, өзге 54 елде орналасқан 71 референдум учаскесі жұмыс атқарады.

Әскери-саяси жағдайдың шиеленісуіне орай және азаматтарымыз санының төмен болуына байланысты, 10 елдегі 11 учаске ашылмайды. Атап айтсақ, Иран, Израиль, Иордания, Қатар, БАӘ (2 учаске), Оман, Ливан, Кувейт, Украина және Эфиопия елдері бар.

Шетелдегі дауыс беретін қазақстандықтардың жалпы саны - 14 380. 

Ең соңғы ашылып, жабылатын референдум учаскесі АҚШ-тың Сан-Франциско қаласында орналасқан. Бұл учаске Астана уақытымен бүгін сағат 19:00-де ашылады және 16 наурызда сағат 08:00-де жабылатын болады.