Рэпер Qurt тың айналасындағы жаңа жанжал полиция тергеуді бастады

Алматыда қаладағы мекемелер бірінің маңында ер адамға жасалған шабуыл туралы хабарламадан кейін полиция сотқа дейінгі тергеуді бастады. Бұған дейін әлеуметтік желіде соққыға жығу оқиғасына қазақстандық рэпер Qurt - Дамир Қойшыбаевтың қатысы бар болуы мүмкін екені туралы жазба жарияланған болатын. Жазба авторының айтуынша, жәбірленуші жанжалдан кейін түрлі жарақатпен ауруханаға түскен, деп хабарлайды Tengri Life.

Полиция не деді?

Алматы полиция департаменті сотқа дейінгі тергеу амалдары басталғанын растады.

"Аталған факті бойынша Медеу аудандық полиция басқармасы қылмыстық іс қозғады (ред. еск.: сотқа дейінгі тергеп-тексеру басталды). Барлық қатысушының жеке басы анықталды. Оларды ұстау шаралары жүргізіліп жатыр. Тергеу жалғасып жатыр. Оның барысы ПД басшылығының бақылауында", - деп хабарлады ведомство.

Ведомство өкілдері тергеу жалғасып жатқанын атап өтті.

Әзірге полиция кімге айып тағылғаны немесе тергеу аясында Qurt-тың мәртебесі қандай екені туралы хабарлаған жоқ.

Бұл оқиға 3 қыркүйекте әлеуметтік желіде жарияланғаннан кейін көпшілікке мәлім болды. Жазба авторы Алматыда 31 тамызға қараған түні, таңғы сағат 4–5 шамасында болған жанжал туралы айтты. Жәбірленуші шешендік өнер курсының студенті екені айтылды.

"Жәбірленуші мен куәгерлердің айтуынша, оны қазақстандық рэпер Qurt, яғни Дамир Қойшыбаев соққыға жыққан. Сабақтан кейін 10-ға жуық студент курс жетекшісі Т. И.-мен бірге кешті барда жалғастырған. Жәбірленуші өз таныстарымен, ал Qurt өз достарымен отырған. Олар таныс та болмаған", - делінген жарияланымда.

Бұдан әрі жазба авторының айтуынша, ер адамдар арасындағы жанжал бұйра шаш туралы қалжыңнан кейін басталған. Оның сөзінше, Qurt жәбірленушіге екі рет келіп, оны арандатқан.

Скриншот: Threads

Автор жанжалдың негізгі бөлігі далада болғанын атап өтті.

"Жәбірленуші не болып жатқанын және мәселе неде екенін түсініп те үлгермеген. Ол шабуыл болады деп күтпегендіктен, есін жия алмай қалған. Qurt оны ұрып, жерге лақтырып, соққының астына алған. Содан кейін шыны шөлмекті сындырып, жәбірленушінің мойын тұсынан ұрмақ болған", - деді ол.

Жәбірленуші жалтарып үлгергенімен, шыны сынығы оның бетіне тиген.

"Ерніне тігіс салуға тура келді. Салдары - мидың шайқалуы, көптеген жарақат пен тілік. Қазір жәбірленуші ауруханада жатыр, өздігінен қозғалуы қиын. Курстың басқа студенттері араласып, Qurt-ты тартып алған. Осыдан кейін ол қашып кеткен, ал жәбірленуші жедел жәрдемді өзі шақырған", - деп жазды жарияланым авторы.

Бұл Qurt-тың есімі зорлық-зомбылыққа қатысты дауда аталған алғашқы жағдай емес.

2025 жылдың шілдесінде оның жұбайы Аружан Қойшыбаева бірнеше апта бұрын, 27 маусымда күйеуі соққанын мәлімдеді. Ол дене жарақаттарының суретін жариялап, әртіс оны бір сағат бойы белдікпен ұрғанын айтты.

"Мені күйеуім - Qurt лақап атымен танымал рэпер (Дамир Қойшыбаев) соқты", - деп жазды ол.

Сондай-ақ Аружан оқиғадан кейін полицияға жүгінгенін, бірақ кейін арызын қайтарып алғанын айтты. Оның сөзінше, тараптар ақыры татуласқан.

Бұл оқиға қоғамда үлкен резонанс тудырды. Жазбалардан кейін Аружан адвокатқа қаражат жинауды да бастады, бұл кейін әлеуметтік желілерде жеке талқылау тақырыбына айналды. Қыз адвокат өзі жариялаған жағдай бойынша жалданғанын, сұрағандарға ақшасын қайтарғанын түсіндірді.

Дамир Қойшыбаев Qurt сахналық есімімен өнер көрсетеді. Рэпер Астана тумасы, ол Скриптонит, Truwer және 104 сияқты қазақстандық хип-хоп сахнасының өкілдерімен бірлесе жұмыс істеу арқылы танымал болды.

Әртістің ең танымал тректері - "Цифры", "Туда-обратно", "Коньяк" және "Плохие привычки".

2023 жылы музыкант скутерден құлап, жаңалықтарға ілінген еді. Сол кезде ол жансақтау бөліміне түскені, ал әріптестері мен жанкүйерлері ол үшін жаппай қан тапсырғаны хабарланған болатын.

Бізді Google-дың негізгі дереккөздер тізіміне қосыңыз