RES 2026: Әзербайжан Каспий теңізі маңындағы елдердің күш жігерін біріктіруге шақырды

– Осы саммиттің нәтижесі қоршаған ортану қорғау бағытында тәжірибе жүзінде іске асатын бастамаларды даярлауға, өңірлік ынтымақтастықты нығайтуға ықпал ететініне сенімдіміз. Климаттың өзгеруі, таза су тапшылығы мәселесінің ушығуы, су ресурстарына жүктеменің артуы салдарынан қарқын алып келе жатқан жаһандық сын-қатерлер жағдайында су қауіпсіздігі мәселесі халықаралық күн тәртібінде басым маңызға ие болды. Осы орайда Әзербайжан жағы Қазақстанның бастамасымен БҰҰ құрамында Халықаралық су ұйымын құру ұсынысын қолдайды, - деді Ә. Асадов.

Бұл тұрғыда ол осы өңірдегі ең өзекті мәселенің бірі Каспий теңізі деңгейінің төмендеуіне қатысты екенін атап өтті.

– Осы сын-қатерді тиімді еңсеру үшін Каспий теңізі маңындағы елдердің ынтымақтастығын нығайту маңызды. Бұл ретте Әзербайжанның бастамасымен Қазақстанмен, Ресеймен, Түрікменстанмен екіжақты жұмыс топтары құрылды. Оның аясында Каспий теңізінің таяздануы себептерін анықтау және тиісті іс-шараларды әзірлеу қадамдары ескерілген. Теңіздің тартылуына климаттың өзгеруі де елеулі түрде әсер етіп отыр, - деді Әзербайжан Премьер-министрі.

Айта кетейік, Дүниежүзілік банк Каспий теңізіне қатысты ірі экологиялық жобаны қаржыландыруды мақұлдады.

Бұған дейін Экология және табиғи ресурстар министрі Ерлан Нысанбаев Каспий теңізінің жай-күйіне қатысты пікір білдіргенін жазған едік.