Ресей әскеріндегі Starlink дағдарысы: Маск ұрылардың жолын кесті?

Ресейлік әскерилер арасында үлкен дүрбелең басталды – олар пайдаланып келген «Starlink» жүйесі толықтай істен шықты. Бұл жағдайдың астарында не жатыр? Бұл мәселені танымал белсенді Қуаныш Еділхантегі Фейбутегі парақшасында тарқатып жазды, деп хабарлайды Arasha.kz.

«Ресми түрде РФ-да Старлинк жоқ, ол үшін РФ Маскке ақша төлемейді. Бұған дейін орыс армиясы Старлинкті емін-еркін қолданып келген, Украинаны шабуылдап жүрген шаһедтер осы Старлинк қызметін пайдаланған. Сондай-ақ барлау мәліметтерін де осы арқылы алып отырған», - деп жазды ол.

Қуаныш Еділхантегінің пайымдауынша, Илон Маск – ең алдымен ірі кәсіпкер. Ал кәсіпкер үшін ең жек көретін нәрсе – өз тауарының ұрланғаны. Ресей бұл технологияны ешкімнен сұрамай, ақысын төлемей пайдаланып келгені белгілі болды. Бұл тек технология емес, бүкіл адамзат жетістігін ұрлаумен келетін ескі әдеттің жалғасы. Сондықтан Маск бұл «схеманың» тамырына балта шапты.

Ресейде желі өшсе, ол Украинада да істен шығуы керек қой деген заңды сұрақ туындайды. Алайда, бұл мәселенің шешімі Украина Қорғаныс министрі Федоровтың жаңа бұйрығында жатыр. 
Қазір майдандағы барлық «Starlink» құрылғылары арнайы тіркеуден өтуде. Бұл тізім тікелей Илон Маскке беріледі. Тіркелген құрылғылардың жылдамдығы тіпті артуы мүмкін.

«Бұған дейін сарбаздар өз ақшасына немесе халық жинаған донатқа алынған құрылғыларды тіркеуге қорыққан болатын. Себебі командирлер оны бөлімше балансына алып қояды деген қауіп болды. Бұйрықта бұл жағы да қарастырылыпты – ешқандай балансқа алынбайды. Тізімге сол окопта отырып-ақ жасырын байланыспен онлайн қосылуға мүмкіндік бар», - дейді автор.

Бұл жүйенің ең басты артықшылығы – ресейліктердің Украина сарбаздарынан тартып алған немесе ұрлап алған құрылғылары енді мүлдем іске аспайды. Тіркеуде жоқ болған соң, олар жай ғана «темір» болып қала бермек.

Қазір Украина армиясында жаппай тіркеу жүріп жатыр және бұл жұмыс аса құпия байланыс жүйелері арқылы жүзеге асырылуда. Мамандар бұл жүйенің ақпараттық қауіпсіздігі мен сатқындықтан қорғалу деңгейі барынша жоғары екенін айтады.