Ресей қазақстандық азаматты құжаттағы қателікке байланысты елден шығармай отыр

Қазақстан азаматы Дмитрий Харисов Ресейден шыға алмай қалғаннан кейін ресми түрде Қазақстан Республикасының заңды азаматы деп танылды. Бұл туралы BES.media басылымына ІІМ баспасөз қызметі хабарлады.

Харисов 2007 жылы Қазақстан азаматтығын алған және ресейлік паспортынан бас тартқан. Алайда ресейлік тарап азаматтықты жоғалту рәсімін дер кезінде ресімдемегендіктен, құжаттық сәйкессіздік туындаған.

ІІМ көші-қон қызметі азамат туралы толық ақпаратты Сыртқы істер министрлігіне жолдады. Қазір консулдық бұл жағдаймен айналысып, құқықтық кеңес беріп, азаматпен байланыста. 

Харисовтың айтуынша, оның құжаттары Уралдағы көші-қон қызметінің архивінен табылған. Құжаттар Ресейге сол кезде-ақ жіберілген, қателік ресейлік тараптан кеткен болуы мүмкін.

«Қазір құжаттар барлық инстанцияға қайта жолданады. Барлығы дұрыс болады деп үміттенемін», — деді ол.

Еске сала кетсек, Харисов Қазақстанға қайтып оралу үшін Жәнібек – Вишневка шекара бекеті арқылы өтпек болғанда Ресейден шығарылмаған. 

Бұған дейін ол бірнеше рет Волгоградтағы ұлын көруге барып, шекараны қиындықсыз кесіп өткен. Ресейлік органдар оның әлі де РФ азаматтығы бар екенін айтып, қайтадан ресейлік паспорт рәсімдеуді ұсынған. 

Алайда Харисов Қазақстанда кәсіпкерлікпен айналысып, 20 жылға жуық уақыт бойы елде тұрып келе жатқанын және азаматтығын өзгерткісі келмейтінін мәлімдеді.

Бүгін, 14:13