Ресейде интернеттің бұғатталуына қарсы шыққан 80 жастағы зейнеткер ұсталды

Пермь полициясы 80 жастағы белсенді Виктор Гилинді ұстап, түнде бөлімшеде қалдырды, деп хабарлады «Рассвет» партиясының Пермьдегі бөлімшесі, деп хабарлайды Arasha.kz.

15 наурызда, қала мэрі шеру өткізуге берген рұқсатын қайтарып алғаннан кейін, зейнеткер интернетті бұғаттауға қарсы митинг өтетін жерге келген. ІІМ қызметкерлері зейнеткерді ұстап, оған полиция талаптарына қарсылық көрсетті (ӘҚБтК 19.3-бабы) деген айыппен әкімшілік хаттама толтырды. 16 наурызда сот оған 2 мың рубль айыппұл салды.

Осыдан кейін полицейлер 80 жастағы пермдікке қатысты «митинг» бабы бойынша (ӘҚБтК 20.2-бабы) жаңа хаттама толтырған. «Соның салдарынан Виктор Гилин күні бойы ештеңе жеген жоқ, тек су ішіп, қазір аштық жариялады», - делінген «Рассвет» жазбасында.

Ақпан айының соңында Виктор Гилин Ресейдегі 17 жастағы саяси тұтқын Арсений Турбинді қолдау мақсатында өзінің төртінші жеке пикетіне шыққан болатын. Оның плакатында: «Владимир Путин! Арсений Турбин қылмыскер емес. Оны дереу босатуды талап етемін», - деп жазылған.

Наурыз айының ортасынан бастап Ресей билігі елде Telegram мессенджерінің жұмысын толық бұғаттай бастады. Downdetector және «сбой.рф» сайттарындағы шағымдар саны, «Коммерсант» келтірген мәліметтер бойынша, тек сенбі, 14 наурызда алты мыңға жетсе, жексенбіде - 12 мың болған.

Сонымен қатар, ел билігі интернетті «ақ тізімдер» (тек рұқсат етілген сайттар ғана жұмыс істейтін режим) бойынша тестілеуден өткізуде. 5 наурыздан бастап Мәскеуде мобильді интернет осылай жұмыс істеп тұр: аймақ тұрғындарына үйреншікті GPS-тің орнына қағаз карталарды пайдалануға және Күн мен жұлдыздарға қарап бағдар алуға кеңес беріледі, ал РБК радиожүргізушісі эфирге рациямен шықты.

Кремльдің баспасөз хатшысы Дмитрий Песков мұндай ажыратулардың «Украина шабуылдар үшін барған сайын күрделі технологиялық әдістерді қолдануына байланысты азаматтардың қауіпсіздігін қамтамасыз ету үшін қажет» екенін мәлімдеді.

Интернетті ажырату кезінде қолжетімді болатын ресурстардың «ақ тізімдерін» 2025 жылдың жазынан бастап сынақтан өткізе бастады. Қолжетімді ресурстар тізіміне мобильді операторлардың, кремльшіл БАҚ-тардың, мемлекеттік органдардың сайттары, маркетплейстер, сондай-ақ ресейлік «ВКонтакте», «Одноклассники» әлеуметтік желілері мен Max мессенджері енгізілген.