Ресейде студенттердің 2 пайызы Қорғаныс министрлігімен келісімшартқа отыруы тиіс

2026 жылдың басында өткен жабық жиында Ресейдің ғылым және жоғары білім министрі Валерий Фальков ірі университеттердің ректорларына студенттердің кемінде 2%-ын Қорғаныс министрлігімен келісімшартқа отырғызу қажет екенін айтқан.

Дереккөздердің айтуынша, бұл талап барлық оқу орындарына ортақ жоспар ретінде ұсынылған.

Тәуелсіз ресейлік БАҚ-тың жазуынша, студенттер арасында әскери қызметке үгіт-насихат 2025 жылдан бастап күшейген. Қорғаныс министрлігі жетекші университеттердің студенттеріне тікелей келісімшартқа отырып, дрон операторлары ретінде қызмет ету мүмкіндігін ұсынып жатыр. Оның орнына жоғары мөлшердегі төлемдер, «ұрыс аймағынан алыс жерде» оқу және бір жылдан кейін университетке қайта оралу мүмкіндігі уәде етіледі.

Студенттер негізінен былтыр құрылған ұшқышсыз жүйелер әскеріне шақырылған. Жалпы, Қорғаныс министрлігі бұл жаңа құрылымға шамамен 78,8 мың адам тартуды жоспарлап отыр.

Ресми деректерге сәйкес, өткен жылы Ресей жоғары оқу орындарында 2,2 миллион ер адам білім алған. Егер 2% жоспары орындалса, армия қатары шамамен 44 мың жаспен толықпақ. Ал егер бұл талап колледждерге де қатысты болса, жалпы саны 76 мың адамға дейін жетуі мүмкін.

Студенттерге келісімшарттан кейін оқуын жалғастыруға мүмкіндік берілетіні, сондай-ақ Украинадағы соғысқа қатысушыларға берілетін мемлекеттік төлемдер мен жеңілдіктер ұсынылатыны айтылған. Ірі университеттер, соның ішінде Мәскеу мемлекеттік университеті мен Санкт-Петербург мемлекеттік университеті қосымша қаржылай қолдау көрсетуге уәде берген.

Қазіргі уақытта оқу орындарында әскери қызметті насихаттау тек жарнамалық плакаттармен шектелмей, студенттер «маңызды тақырыптар» кездесулеріне және «ерлік сабақтарына» шақырылуда. «Вёрстка» басылымының дерегінше, Ресей бойынша 200-ден астам осындай үгіт шарасы өткен.

Құқық қорғаушылар келісімшартқа отырған жастар қажетті талаптарға сай келмесе немесе дрон операторлығы бойынша жұмысқа жіберілмесе, оларды басқа әскери бөлімдерге ауыстыруы мүмкін екенін ескертеді.

Кәсіпорындарға да міндет жүктелді

Ресейдің Рязань облысында билік жұмыс берушілерге де әскери келісімшартқа адам тарту міндетін жүктеген.

Conflict Intelligence Team жариялаған құжатқа сәйкес, облыс губернаторы Павел Малков кәсіпорындарға нақты тапсырмалар берген:

150–300 қызметкері бар ұйымдар – 2 адам,

300–500 қызметкері бар ұйымдар – 3 адам,

500-ден көп қызметкері бар ұйымдар – 5 адам әскери келісімшартқа тартуы тиіс.

Бұл шешім Ресей президенті Владимир Путиннің 2022 жылғы жарлықтарына негізделген. Құжатта өңір басшыларына армия қажеттіліктерін қамтамасыз ету бойынша өкілеттік берілген.

Сонымен қатар, бұл талаптарды орындамаған кәсіпорындарға қандай жауапкершілік қарастырылатыны нақты айтылмаған.